«ԱՄՆ-ն ու Ռուսաստանը համեմատելիս պետք է հրաժարվենք էմոցիաներից»․ Արման Բաբաջանյան

ԱԺ նախկին պատգամավոր Արման Բաբաջանյանի ֆեյսբուքյան գրառումը․ «ԱՄՆ-ն ու Ռուսաստանը համեմատելիս պետք է հրաժարվենք էմոցիաներից ու գնահատենք չափելի ցուցանիշները։
Այսօր Freedom House-ի գնահատմամբ ԱՄՆ-ը ունի 84/100 և դասվում է «Ազատ», իսկ Ռուսաստանը՝ 12/100, «Անազատ» կարգավիճակով։
Կոռուպցիայի ընկալման ինդեքսում ԱՄՆ-ը ստացել է 64, Ռուսաստանը՝ 22։ Սա պետության որակի տարբերություն է, որտեղ իրավունքը գործում է որպես ընդհանուր կանոն:
Այո, ԱՄՆ-ում կան լուրջ խնդիրներ, բևեռացում, ներքին հակասություններ։ Բայց տարբերությունն այն է, որ ժողովրդավար համակարգերում ճգնաժամը դառնում է բարեփոխման պատճառ, ոչ թե ազատությունների վերջնական չեղարկում։ Freedom House-ի 2025 զեկույցը հենց սա է ցույց տալիս՝ դեմոկրատիաների մարտահրավերները իրական են, բայց ինստիտուցիոնալ հակակշիռները շարունակում են գործել։
Միջազգային հարաբերություններում «բարի» ու «վատ» պետություններ չեն լինում․ լինում են շահեր։ ԱՄՆ-ն էլ իր շահերով է գործում։ Բայց երբ շահը համընկնում է իրավական սկզբունքների, բաց շուկայի, տեխնոլոգիական զարգացման և գործընկերների սուբյեկտայնության հետ, այդ ազդեցությունը դառնում է զարգացման պատուհան։
Սրան հակառակ՝ ավտորիտար մոդելը սովորաբար պահում է վերահսկողությունը կոնֆլիկտի, կախվածության և մշտական անվստահության միջոցով։
Հայաստանի չպետք է ընտրի կարգախոսներ, պետք է ընտրի այն համակարգը, որտեղ պետությունն ուժեղանում է ինստիտուտներով, տնտեսությունը՝ մրցակցությամբ, անվտանգությունը՝ դաշնակցային պատասխանատվությամբ, իսկ խաղաղությունը՝ փոխադարձ շահի վրա կառուցված երկարաժամկետ մեխանիզմներով։
Սա է իրական պրագմատիզմը։ Սա է պետական մտածողությունը»։