Հոմերոսի «Ոդիսականի» հիման վրա նոր հեռուստասերիալը նախատեսվում է նկարահանել նաև Հայաստանում

Հոմերոսի «Ոդիսական» էպոսի հիման վրա ստեղծվող «Odysseus» հեռուստասերիալի նկարահանումները նախատեսում են սկսել 2027 թվականի սկզբին Հունաստանում և Հայաստանում։ Այս մասին հայտնում է Deadline-ը։
Հրապարակման համաձայն՝ նախագիծը ներկայացնելու է դյուցազներգության ավելի պատմական և իրատեսական տարբերակը՝ կենտրոնանալով Բրոնզի դարի աշխարհի, ծովագնացության, պատերազմի և գոյատևման թեմաների վրա։
Սերիալը համատեղ արտադրություն է լինելու հունական Tanweer Productions, ամերիկյան Tectonic և հայ-ամերիկյան USATV ընկերությունների միջև։ Գործադիր պրոդյուսերներից մեկը USATV-ի ներկայացուցիչ Վահագն Սարգսյանն է։
Ըստ Deadline-ի՝ նախագծի ստեղծման վրա աշխատել են «Stranger Things», «Halo», «Black Sails» և «Wu Assassins» նախագծերի փորձ ունեցող մասնագետներ։ Հրապարակման մեջ նշվում է նաև, որ նախագիծը կապ չունի Քրիստոֆեր Նոլանի «The Odyssey» ֆիլմի հետ։