Յուրի Պետրոսյանի 85-ամյակին նվիրված հետահայաց ցուցահանդեսը ներկայացնում է արվեստագետի ստեղծագործական ուղու տարբեր փուլերը

Հայաստանի ազգային պատկերասրահում բացվել է ժողովրդական նկարիչ, քանդակագործ Յուրի Պետրոսյանի 85-ամյակին նվիրված «Մտորումներ» խորագրով հետահայաց ցուցահանդեսը։

Ցուցադրությունն ընդգրկում է արվեստագետի տարբեր տարիների ստեղծագործությունները՝ ներկայացնելով նրա գեղարվեստական որոնումները, ոճական փոփոխություններն ու նյութի հետ փորձարարական աշխատանքները։

Երեք ցուցասրահներում ներկայացված են քանդակներ, գրաֆիկական և կերամիկական աշխատանքներ, մանր պլաստիկա ու մետաղալարե հորինվածքներ։ Առանձին տեղ են զբաղեցնում մոնումենտալ քանդակագործության նմուշները, այդ թվում՝ Արամ Խաչատրյանի և Հովհաննես Այվազովսկու հուշարձանների հեղինակային լուծումները։
Ցուցահանդեսի առանցքում մարդու կերպարն է՝ իր հույզերով, ներքին հակասություններով և հոգևոր ապրումներով։

Տարբեր նյութերի ու արտահայտչամիջոցների համադրությամբ Յուրի Պետրոսյանը ստեղծել է ինքնատիպ գեղարվեստական աշխարհ, որտեղ քանդակը դառնում է ոչ միայն ձևի, այլև գաղափարի արտահայտություն։

«Մտորումներ» ցուցահանդեսը հնարավորություն է տալիս մեկտեղված դիտելու արվեստագետի բազմաժանր ստեղծագործությունը և բացահայտելու նրա գեղարվեստական մտածողության առանձնահատկությունները։