«Հնագույն Հայաստան»․ Ակրոպոլիսի թանգարանում կներկայացվի Հայաստանի հազարամյակների պատմությունն ու մշակույթը

Նոյեմբերի 20-ին Աթենքի Ակրոպոլիսի թանգարանում կբացվի «Հնագույն Հայաստան» խորագրով ցուցահանդեսը, որը հունական հանրությանը կներկայացնի Հայաստանի բազմադարյա պատմությունն ու մշակութային ժառանգությունը։
Ցուցահանդեսը կազմակերպվում է Ակրոպոլիսի թանգարանի և Հայաստանի պատմության թանգարանի համագործակցությամբ և կգործի մինչև 2027 թվականի փետրվարի 28-ը։
Ցուցադրության հիմքում Հայաստանի պատմության թանգարանի հավաքածուից ընտրված շուրջ 200 հնագիտական նմուշներ են։ Դրանք կներկայացնեն Հայաստանի պատմությունը՝ նախապատմական ժամանակաշրջանից մինչև մ.թ. IV դարը։
Առանձնահատուկ տեղ է հատկացվելու Ուրարտուի քաղաքակրթությանը, ինչպես նաև Հայաստանի պատմամշակութային կապերին Մերձավոր Արևելքի, Կիպրոսի, Կրետեի և Էգեյան աշխարհի հետ։
Ցուցահանդեսի նպատակն է բացահայտել Հայաստանի հնագույն քաղաքակրթության տեղն ու նշանակությունը տարածաշրջանի պատմության մեջ՝ ներկայացնելով նաև տարբեր ժողովուրդների միջև դարերի ընթացքում ձևավորված մշակութային փոխազդեցությունները։
Նախագիծն իրականացվում է Հայաստանի կրթության, գիտության, մշակույթի և սպորտի նախարարության և Հունաստանում Հայաստանի դեսպանության աջակցությամբ։