«Ամենամեծ մարտահրավերը մնում է ազգային ինքնագիտակցության պահպանումը»․ Արմեն Հովասափյան

ՀՀԿ խորհրդի անդամ Արմեն Հովասափյանի ֆեյսբուքյան գրառումը․ «Պատմության ընթացքում քանիցս հող և պետականություն կորցրած ժողովուրդն իր գենետիկ հիշողության խորքում մշտապես կենդանի է պահում անարդարության հանդեպ իր վերաբերմունքը։ 1988 թվականն այդ անարդարության դեմ հայ ժողովրդի ընդվզման հերթական փուլն էր, հերթական, բայց գուցե կարևորագույնը։ Ուղիղ 38 տարի առաջ այս օրը սկիզբ դրվեց Արցախյան շարժմանը՝ գործընթաց, որը շրջադարձային էր հայ ժողովրդի գիտակցության և աշխարհընկալման ձևավորման մեջ։ Ցավոք, մենք չկարողացանք լիարժեք օգտագործել այդ շարժման արդյունքները, և, ի վերջո, դարձանք դավաճանության ու աշխարհաքաղաքական առուծախի շարքային զոհը։
Փաշինյանն այսօր փորձում է ձևավորել «իրական Հայաստանի» կեղծ գաղափարախոսություն, որը պարտադիր կերպով պետք է կիրառվի հանրային կյանքում, որն ակնհայտ հակասահմանադրական քայլ է։ Գործող Սահմանադրությունն ապահովում է գաղափարական բազմակարծությունը (պլյուրալիզմը) և հստակ սահմանում է, որ «ՀՀ-ում երաշխավորվում են գաղափարախոսական բազմակարծությունն ու բազմակուսակցական համակարգը»։ Գործ ունենք նեոբոլշևիկ իշխանության հետ, որը բացառում է այլընտրանքային մտածողությունը և ձգտում է պետության վրա տարածել միայն իր գաղափարական օրակարգը։
Հիշողությունը մարդկության տիեզերական պարգևներից մեկն է, որը շատ հաճախ ճգնաժամային ու փակուղային իրավիճակներում դառնում է ազգի գլխավոր խթանիչ ուժը՝ միավորելով այն որպես հավաքական մարմին։
Պատմությունը ցույց է տվել, որ նույնիսկ ամենամեծ կորուստներից հետո, երբ թվում է, թե ազգային դիմադրությունը ճնշված է, հավաքական կամքը վերածնվում է։ Այսօր, երբ մեզ պարտադրում են մտածողության ու ազգային ինքնության դեֆորմացիա, երբ փորձ է արվում մաշեցնել մեր պատմական հիշողությունը, ամենամեծ մարտահրավերը մնում է ինքնագիտակցության պահպանումն ու վերականգնումը։
Չմոռանանք, որ որևէ ռեժիմ հավերժ չէ, բայց ազգային կամքը, եթե չկոտրվի, անպայման գտնելու է վերածննդի ճանապարհը։ Հայ ժողովուրդը կարող է կորցնել ժամանակ, տարածք, նույնիսկ ուժ, բայց եթե նա պահպանի իր ազգային ինքնությունը, ապագան միշտ լինելու է հաղթողի կողմում։ Հետևաբար մեր խնդիրն է չտրվել գաղափարական կեղծարարությանը, չմոռանալ մեր պայքարի գինը և պատրաստ լինել այն պահին, երբ պատմությունն իր հերթական հնարավորությունը կտա վերականգնելու ազգային իրավունքներն ու արժանապատվությունը»։