«ՀԱԵ-ի շուրջ Նիկոլ Փաշինյանի նախաձեռնած գործընթացը էապես առնչվում է նաև Մերձավոր Արևելքի վերաձևման պրոցեսներին». Հակոբ Բադալյան

Քաղաքական մեկնաբան Հակոբ Բադալյանի թելեգրամյան գրառումը. «Օրերս Հանրային հեռուստաընկերությանը տված հարցազրույցում Նիկոլ Փաշինյանը Հայ Առաքելական եկեղեցու բարձրաստիճան հոգևորականությանը համեմատել էր «ծայրահեղ իսլամիստների» հետ:

Շատերը այս համեմատության ներքո կտեսնեն զուտ համեմատություն, այսպես ասած «նենգափոխ-պերճախոսության» այն ոճի շրջանակում, որին հիանալի տիրապետում է Նիկոլ Փաշինյանը::

Ես սակայն, այս համեմատության ներքո այդուհանդերձ տեսնում եմ ավելին, քան պարզապես վերը նկարագրածս ոճը:

Իսկ որտե՞ղ են իրենց գործունեությամբ հատկապես աչքի ընկնում «իսլամ ֆունդամենտալիստները»: Ո՞րն է այն ռեգիոնը, որը ըստ էության կարող է դիտվել նրանց «օջախ»: Այո, մերձավորարևելյան ռեգիոն: Քանի՞ցս եմ ասել, որ ՀԱԵ շուրջ Նիկոլ Փաշինյանի նախաձեռնած գործընթացը միայն ներհայաստանյան կամ հայկական չէ, այլ էապես առնչվում է նաև Մերձավոր Արևելքի վերաձևման պրոցեսներին: Որովհետև Հայ Առաքելական եկեղեցին ունի իր ծանրակշիռ, խորը պատմական ներկայությունը այդ ռեգիոնում՝ օժտված շոշափելի իրավունքներով, հետևաբար՝ սուբյեկտությամբ:

Եթե Հայաստանը պետություն է, որն ուզում է լինել քաղաքական սուբյեկտ, ապա եկեղեցին այդ պետության ներուժն է: Եթե Հայաստանը կենցաղապետություն է, որտեղ սուբյեկտը միայն «ուտել, խմելն ու էժան ավիատոմսից ստացվող լուսանկարային էֆեկտները սոցցանցերում շաղ տալն է», ապա եկեղեցու այդ ներուժը դառնում է խանգարող:

Հարց է առաջանում՝ իսկ ի՞նչ խնդիր է լուծում Փաշիյանն իր այդ համեմատությամբ: Կարծում եմ, որ դրա ձայնը կլսվի հետո: Չզարմանաք, եթե հանկարծ որևէ արտաքին տիրույթում լսեք այդ գնահատականի «ինտերպրետացիա»»: