«Կապիտուլյանտի ռեժիմը թուրքերին «էստի համեցեք» է ասում՝ ՀՀ-ն դարձնելով թուրք-ադրբեջանական վիլայեթ»․ Էդուարդ Շարմազանով

ՀՀԿ Գործադիր մարմնի անդամ Էդուարդ Շարմազանովի ֆեյսբուքյան գրառումը. «Սերժ Սարգսյանը ՄԱԿ-ի ամբիոնից «գրողի ծոցն էր» ուղարկում թուրքական նախապայմանները, իսկ կապիտուլյանտները «էստի համեցեք» են ասում։
Թուրքիայի գերիշխանության տակ ապրել ցանկացող կապիտուլյանտների ռեժիմին հիշեցնեմ դեռևս 1993-ի ամռանը թուրքերի նախկին վարչապետ Էջևիթի խոսքերը.
«Թուրքիան ի վիճակի է Նախիջևանն ու Ադրբեջանը միացնող միջանցք բացել ՝ օդային գործողությունների միջոցով։ Միայն այս ձևով կարելի է հավասարակշռել կորուստները ԼՂ-ում։ Միայն այս ճանապարհով կարելի է համոզել Հայաստանին արդարացի համաձայնության գալ Ադրբեջանի հետ»։
Իսկ այժմ Թուրքիան և Ադրբեջանը «ճանապարհների ապաշրջափակման» անվան տակ պատրաստ են գործարկել «պանթուրքիզմի» ճանապարհը, իսկ կապիտուլյանտ ռեժիմը դա ներկայացնում է «խաղաղասիրություն»։
Բաքվում Արցախի ռազմա-քաղաքական ղեկավարությանը ապօրինի դատավճիռ են կարդում, իսկ սրանք կամ «բարաբան» են խփում, կամ՝ Ալիևին շնորհակալություն հայտնում։
Սերժ Սարգսյանի կառավարման ժամանակ Ալիևն էր բողոքում միջազգային հանրության դիրքորոշումից։
Նույն Ալիևն է ասել,որ «Ադրբեջանը 30 տարի պարտված է եղել բոլոր հարթակներում»։
Սերժ Սարգսյանի առաջնորդությամբ հայ ժողովուրդը հաղթեց Ապրիլյան պատերազմում, իսկ Նիկոլի գլխավորությամբ ոչ միայն պարտվեցինք, այլ նաև դառնում ենք «թուրքական աշխարհի» մաս։
Սերժ Սարգսյանի նախաձեռնած «ֆուտբոլային դիվանագիտությունը» Թուրքիային դուրս էր թողնում Արցախյան կարգավորման գործընթացից:
Սերժ Սարգսյանը ՄԱԿ-ի ամբիոնից «գրողի ծոցն էր» ուղարկում թուրքական նախապայմանները, իսկ կապիտուլյանտի ռեժիմը թուրքերին «էստի համեցեք» է ասում՝ Հայաստանը դարձնելով թուրք-ադրբեջանական վիլայեթ»։