«Ծնկի են գալիս իրենց դավաճանության հետևանքով զոհվածների շիրիմների առաջ, որ խաբեն ժողովրդին»․ Նաիրի Հոխիկյան

Լրագրող Նաիրի Հոխիկյանի ֆեյսբուքյան գրառումը․ «Բանակի օրը բանակին նվիրված ամենատարբեր շնորհավորանքներ ու մաղթանքներ են հնչում, տաքուկ անկյուններում մարդիկ բազմաթիվ կենացներ են խմում, իշխանությունները ոտնատակ են տալիս բանակի պատիվը, բայց ծնկի են գալիս իրենց դավաճանության հետևանքով զոհվածների շիրիմների առաջ, որ ևս մեկ անգամ խաբեն ժողովրդի աչքը, ընտրություններին պատրաստվող քաղաքական գործիչները գովում են բանակը, բայց թշնամու հետ խնդիրների լուծումն անվանում են միայն դիվանագիտական ճանապարհ, որ հանկարծ չվախեցնեն իրենց պոտենցիալ ընտրողներին։
Իսկ իրականում ժողովուրդները իրենց ապագան կերտում են միայն պատերազմներով ու արյամբ։
Չի եղել երբևէ ու չկա մի երկիր, որ առանց պատերազմի կարողանա տարածք ստանալ և հաջողություն ունենալ իր ապրած տարածքում։ Հեքիաթներ են բոլոր այն լոլո-ները, թե հնարավոր է դիվանագիտություն վարել ու խաղաղություն հաստատել։ Այդ հեքիաթներին նույնիսկ Նիկոլը չի հավատում, ու դա է պատճառը, որ հրամանատարներին պարբերաբար ասում է, թե ուշադրություն չդարձնեն իր պաշտոնական հայտարարություններին ու խաղաղության կոչերին, քանի որ Ադրբեջանը և Թուրքիան միշտ էլ պատրաստվում են Հայաստանի վրա հարձակման։
Բանակը համազգեստ հագած մարդիկ չեն, որոնք լավ շարային են քայլում։ Բանակը զորքն է, որը ունի մարտական բարձր պատրաստություն, լավ զինված է և ամենակարևորը՝ գիտի, թե ինչ է հայրենիքը։ Բանակը ստեղծված է կռվելու համար, իսկ դիվանագիտությունը ուժեղ է միայն այն ժամանակ, երբ բանակը հաղթել է պատերազմում։
Վստահ եմ, հիմա բազմաթիվ մայրեր ու որոշ հայրեր կարձագանքեն, թե ում երեխեքի հաշվին ես պատերազմում։ Շատ եմ լսել այդպիսի խոսքեր։ Հասկանում եմ, որ պարզ մարդիկ չեն կարող հասկանալ պետության իրական կառուցվածքը և պարտավոր էլ չեն պատասխանատվություն կրել պետականության համար, հետևաբար այդ «ում երեխեքի հաշվին ես պատերազմում» արտահայտությանն ուշադրություն չեմ դարձնում։
Հիշեք, ձեզ կարող են խաբել «խաղաղության» ու «դիվանագիտության» քաղցր կտերով, բայց պատերազմը անխուսափելի է։ Կարող եք ինձ համարել «բայղուշ», համարել «վատատես» կամ նման մի բան։ Ձեր գործն է, բայց ինչպես նախկինում եմ մշտապես ասել, հիմա էլ եմ ասում՝ քաղցր սուտը դառը ճշմարտությունից հաստատ ավելի լավ չի։
Ընտրություններում ձեզ կխաբեն խաղաղության ու դիվանագիտության կտերով, մինչդեռ իրականում մեր թշնամի Ադրբեջանը և Թուրքիան պատերազմ սկսելու են, և հաջողության հասնելու համար պետք է մեր բանակը պատրաստել պատերազմի։
Սա է իրականությունը, մնացածը կեղծիք է»։