«Հայաստանի սահմանային ամրաշինական աշխատանքներին օտարազգիների ներգրավումը լուրջ վտանգ է»․ Նաիրի Հոխիկյան

Լրագրող, հանրային գործիչ Նաիրի Հոխիկյանի ֆեյսբուքյան գրառումը․ «Հայաստանի սահմանային ամրաշինական աշխատանքները կատարվում են հիմնականում հնդիկների, պարսիկների, նույնիսկ պակիստանցիների և արաբների մասնակցությամբ։ Աշխարհում այդպիսի ուրիշ օրինակ երևի չկա, որ երկրի անվտանգության գաղտնի կառույցները, բունկերները, հրետանու թաքստոցները կառուցեն օտար երկրների քաղաքացիները՝ ձեռքի տակ ունենալով բոլոր ռազմավարական քարտեզները։
Հայաստանի ՊՆ-ն արդարանում է, թե բոլոր դեպքերում թշնամու աթս-ները նկարում են մեր շինարարական աշխատանքները, հետևաբար թաքցնելու բան չկա։
Այդ տրամաբանությամբ կարող եք ոչինչ չանել, միևնույն է, թշնամին կարող է նաև հաղթել։
Ռազմական ոստիկանությունն ինձ հավաստիացնում է, թե Հայաստանի առաջնագծում աշխատող օտարազգիների մոտից հավաքում են հեռախոսները, որպեսզի չնկարեն։ Մինչդեռ գրեթե ամեն շաբաթ ինձ ուղարկում են այդ նույն օտարազգիների նկարած ֆոտոներ ու վիդեոներ մեր առաջնագծից, բունկերներից և թաքստոցներից։
Բազում անգամներ դիմել եմ ռազմական ոստիկանությանը, որ օտարազգիների ներգրավումը լուրջ վտանգ է սահմանին կանգնած մեր զինվորների կյանքի համար։ Վստահեցրել են, թե վերահսկվում է, այնինչ մի շարք գաղտնի ռազմական տեղեկություններ արդեն դուրս են եկել Հայաստանից։
Շինարարական ընկերություններն էլ արդարանում են, թե հայերը չեն ուզում աշխատել, դրա համար իրենք ներգրավում են հնդիկներին ու պարսիկներին։
Իհարկե, կան ծույլ մարդիկ, բայց ես հասկացել եմ մեկ բան՝ հայերին խաբել ու աշխատանքի դիմաց փող չտալ չեն կարող, իսկ հնդիկներին, պարսիկներին, արաբներին, պակիստանցիներին ու մյուս օտարազգիներին կարող են ամիսներով ձրի աշխատացնել, հետո ծեծել ու ճամփի դնել։
Նրանք էլ իրենց ունեցած գաղտնի տեղեկություններն ավելի թանկ գնով վաճառում են մեր թշնամիներին։
Փաստերը բազմաթիվ են»։