Զելենսկին ԱՄՆ-ին կոչ է անում ճնշում գործադրել Ռուսաստանի, ոչ թե իր վրա

Միացյալ Նահանգները կարող է օգնել, որ Ուկրաինայում պատերազմն ավարտվի, բայց դրա համար անհրաժեշտ է ավելի մեծ ճնշում գործադրել Ռուսաստանի վրա, ասել է Ուկրաինայի նախագահ Վլադիմիր Զելենսկին։ Ուկրաինայի առաջնորդն այս հայտարարությունն արել է Die Welt-ին և Politico-ին տված հարցազրույցում։
Զելենսկին նշել է, որ Ուկրաինան կողմ է բանակցություններին, և ԱՄՆ-ի նախագահ Դոնալդ Թրամփի ազդեցությունը դրանցում գլխավորն է։ Նա նաև նշել է, որ Միացյալ Նահանգները պետք է իր ճնշումը կենտրոնացնի Ռուսաստանի վրա։

«Մենք չենք վստահում Ռուսաստանին, բայց կարծում եմ և հավատում եմ, որ ամերիկացիներն իսկապես ցանկանում են ավարտել այս պատերազմը։ Հուսով եմ, որ նրանք կօգնեն մեզ, բայց մեզ անհրաժեշտ է ավելի մեծ ճնշում գործադրել Ռուսաստանի վրա, ոչ թե՝ ինձ վրա»,- ասել է Ուկրաինայի նախագահը։

Զելենսկու հայտարարությունները հնչել են մեկ շաբաթ անց այն բանից հետո, երբ Թրամփը կրկին հիասթափություն հայտնեց Ուկրաինայի նախագահի նկատմամբ՝ հայտարարելով, որ Ուկրաինայի առաջնորդը պետք է «զբաղվի գործերով» և համաձայնության հասնի։ Թրամփը ակնարկել է, որ ավելի շատ վստահում է Պուտինի պատրաստակամությանը հրադադարի շուրջ բանակցելու հարցում, քան Զելենսկիին՝ առանց ապացույցներ ներկայացնելու իր դիրքորոշումը հիմնավորելու համար։ «Կարծում եմ՝ Պուտինը պատրաստ է համաձայնության հասնելուն»,- ասել էր Թրամփը։