«Հուսով եմ՝ կունենանք արդարացման վերդիկտ»․ Ռուբեն Մելիքյան

Նարեկ Սամսոնյանի և Վազգեն Սաղաթելյանի («Իմնեմնիմի»-ի» գործ) հերթական դատական նիստից հետո իրավապաշտպան Ռուբեն Մելիքյանը լրագրողների հետ զրույցում նշեց․ «Անհրաժեշտ է տարանջատել վիտուալ տիրույթը ռեալ իրական տիրույթից, դրանք սկզբունքային տարբերություն ունեն։ Այստեղ ապացուցումների խնդիր չկա, կա իրավական գնահատականի խնդիր։

Կարծում եմ՝ դատական այս գործընթացը մարդկանց լռեցնելու համար է արվում․․․ Հուսով եմ՝ կունենանք արդարացման վերդիկտ»։

Հիշեցնենք՝ մարտի 22-ին Քննչական կոմիտեն հայտարարել էր, որ «Իմնեմնիմի» փոդքասթի հաղորդավարներ Սամսոնյանին և Սաղաթելյանին խուլիգանություն կատարելու հոդվածով մեղադրանք է առաջադրվել՝ հաղորդման ընթացքում ՀՀ կառավարության անդամների և իշխանության ներկայացուցիչների հասցեին «հայհոյանքներ և անպարկեշտ արտահայտություններ հնչեցրելու» համար։

Սամսոնյանը և Սաղաթելյանը 2 ամսով կալանավորվել էին, այնուհետև ազատ արձակվել՝ վարչական հսկողությամբ․ պայմանը՝ հրապարակավ չհայհոյել ու անպարկեշտ արտահայտություններ թույլ չտալ, ինչպես նաև եթեր դուրս չգալ «Իմնեմնիմի» փոդքասթով»։