«Գործադուլն անխուսափելի է, եթե ընդդիմությունը ցանկանում է հաղթել այս պայքարում»․ Կարեն Վրթանեսյան

Ռազմական փորձագետ Կարեն Վրթանեսյանի ֆեյսբուքյան գրառումը. «Քաղաքապետարանի վերջին 2 օրվա ապօրինությունները պատասխան քայլեր են պահանջում ընդդիմությունից։
Երևի, լսել եք, որ ավիրյանականները որոշ երթուղիներում մարդկանց ահաբեկում են և փորձում ավտոբուսից բռնի ուժով իջեցնել։ Եթե ընդդիմությունը չարձագանքի, ապա այս ապօրինությունը, ցավոք, կարող է հնազանդեցնել տրանսպորտից օգտվող երևանցիների մեծ մասին։
Պատասխան քայլերի 2 տարբերակ եմ տեսնում.
1. Բոյկոտի ակտիվից, իրավաբաններից և լրագրողներից կազմված օպերատիվ արձագանքման խմբեր, որոնք քաղաքացիներից ահազանգ ստանալուն պես կգնան դեպքի վայր, կբացահայտեն քաղաքապետարանի «հաստավզներին», live-երով կահազանգեն ապօրինությունների մասին։
2. Բոյկոտը բարձրացնել որակապես նոր մակարդակի, այն է՝ համաքաղաքային գործադուլի։ Հիմնավորումը շատ պարզ է. տրանսպորտի ապօրինի և չհիմնավորված թանկացումը կտրուկ ավելացնում է աշխատավորների ֆինանսական բեռը։ Ըստ այդմ գործատուները կա՛մ պետք է բարձրացնեն մարդկանց աշխատավարձները 20–30 հազարական դրամներով, կամ էլ թո՛ղ քաղաքապետարանից հաշիվ պահանջեն, ստիպեն վերադառնալ 100 դրամի, հակառակ դեպքում ամբողջ քաղաքը կանգնելու է։
Ի դեպ, առաջին կետը մի քանի օր կարող է արդյունավետ լինել, բայց հետո Նիկոլը մեյդան է բերելու կարմիրբերետավորների։
Այնպես որ գործադուլի քայլը միևնույն է անխուսափելի է, եթե Երևանի ընդդիմությունը ցանկանում է հաղթել այս պայքարում»։