«Քաղաքականությամբ զբաղվողը պետք է իր վերաբերմունքն ի ցույց դնի խաղաղության պայմանագրի վերաբերյալ»․ Սամվել Ասլիկյան

ԱԺԲ անդամ Սամվել Ասլիկյանի ֆեյսբուքյան գրառումը․ «Պե՞տք է խոսել ընտրություններից առաջ Արցախի և այլ տարածքների մասին, թե՞ ոչ։
Եկեք տրամաբանենք սթափ և առանց էմոցիաների։
X անձը, որը զբաղվում է քաղաքականությամբ և պատրաստվում է ընտրությունների, պետք է հստակ պատկերացումներ ունենա այն մասին, թե ի՞նչ է նա անելու, երբ ունենա պետական իշխանություն։
Մասնավորապես, այսօրվա կարևորագույն հարցերից են հայ-ադրբեջանական խաղաղության բանակցությունները և խաղաղության պայմանագիրը։
Հետևաբար, քաղաքականությամբ զբաղվող և ընտրություններին պատրաստվող X անձը պետք է իր վերաբերմունքը ի ցույց դնի խաղաղության պայմանագրի վերաբերյալ։
Կա 2 տարբերակ․
- Այո, ես կողմ եմ սովետական 29 հազարանոց սահմաններին, համաձայն եմ ստորագրել խաղաղության պայմանագիրը և փակել Արցախի ու այլ տարածքների թեման և էջը։
- Ոչ, ես մերժում եմ սովետական 29 հազարանոց սահմանները, համաձայն չեմ ստորագրել խաղաղության պայմանագիրը և չեմ փակում Արցախի ու այլ տարածքների թեման և էջը։
Առաջին տարբերակի դեպքում ամեն բան պարզ է։
Բայց երկրորդ տարբերակի դեպքում առաջանում են հարցեր։
Հարգելի և սիրելի քաղաքականությամբ զբաղվող, ընտրություններին պատրաստվող և նախընտրական քարոզարշավին մասնակցող X անձ, եթե ոչ 29 հազարանոց սահմանները, ապա որո՞նքն են Հայաստանի Հանրապետության ձեր պատկերացրած իրավական սահմանները։
Որո՞նք են ՀՀ իրավական սահմանները, հարգելի քաղաքական գործիչ։
Իհարկե, այդ պատասխանը պետք է լինի քաղաքական, առանց էմոցիոնալության, տեղին թե անտեղի կրկնելու և փաթոսի, սակայն այն պարտադիր պետք է տրվի»։