Թուրքիայում հյուրանոցում բռնկված հրդեհի հետաքննության շրջանակներում 11 մարդ է ձերբակալվել

Թուրքիայի Բոլու քաղաքի փոխքաղաքապետը և հրշեջ ծառայության ղեկավարի տեղակալը ձերբակալվել են հյուրանոցներից մեկում հունվարի 21-ին բռնկված հրդեհի հետաքննության շրջանակներում։ Այս մասին X սոցիալական ցանցում հայտնել է Թուրքիայի արդարադատության նախարար Յըլմազ Թունչը։

Նա նշել է, որ հետաքննության շրջանակներում 11 մարդ է բերման ենթարկվել, այդ թվում՝ Բոլուի փոխքաղաքապետը, Բոլուի հրշեջ ծառայության փոխտնօրենը, հյուրանոցի սեփականատերը, ընկերության գլխավոր տնօրենը և հյուրանոցի տնօրենը։

Հիշեցնենք, որ հունվարի 21-ի գիշերը խոշոր հրդեհ է բռնկվել Բոլու նահանգի Կարտալկայա լեռնադահուկային հանգստավայրի հյուրանոցներից մեկում։ Շենքը գտնվում է լեռան վրա, ինչը դժվարացրել է հրշեջների աշխատանքը։ Վերջին տվյալներով՝ զոհերի թիվը հասել է 76-ի։