Բռնցքամարտի երիտասարդների ԵԱ. ունենք ևս 4 բրոնզե մեդալ

Հայաստանի հավաքականի կազմում մեդալակիր է դարձել 75 կգ քաշային Արմեն Պողոսյանը: Նա կիսաեզրափակչում ուժերը չափել է Իտալիայի ներկայացուցչի հետ և 3-4 հաշվով ցավալի պարտություն է կրել՝ արժանանալով բրոնզե մեդալին:

Կիսաեզրափակչի իրենց մենամարտերն են անցկացրել նաև 63,5 կգ քաշային Արթուր Մկրտչյանը, 67 կգ քաշային Յուրա Բաբլումյանը և 71 կգ քաշային Արման Միսկարյանը:

63,5 կգ քաշային կարգի կիսաեզրափակչում Հայաստանի ներկայացուցիչ Արթուր Մկրտչյանն ուժերն է չափել ռումինացի Նիջու Տուդորոյի հետ և 2:5 հաշվով վիճելի պարտություն է կրել, ինչի արդյունքում դարձել է բրոնզե մեդալակիր: Ռումինացին դուրս է եկել եզրափակիչ և կպայքարի հաղթողի տիտղոսի համար, գրում է «Արմսպորտ»-ը:

Բաբլումյանն ուժերն է չափել ռուսաստանցի Ալեքսեյ Գուկովի հետ և երեք ռաունդանոց մենամարտում մրցավարների միաձայն որոշմամբ 0-5 հաշվով զիջել է մրցակցին՝ արժանանալով երրորդ մրցանակին:

Միսկարյանը մրցել է հունգարացի Քրիստիան Նիլեբորգի հետ. առաջին ռաունդն ավարտվել է մրցակցի, իսկ երկրորդ ռաունդը՝ հայ բռնցքամարտիկի հաղթանակով: Վճռորոշ՝ երրորդ ռաունդն, անցել է բավական լարված պայքարում և ավարտվել հունգարացու հաղթանակով՝ 5-2 հաշվով: