«Իշխանությունների հետ որևէ պայմանավորվածություն չի եղել, այդ պատճառով մարդիկ գտնվում են ճաղերի ետևում»․ Արթուր Խաչատրյան

«Հայաստան» խմբակցության քարտուղար Արթուր Խաչատրյանն այսօր ԱԺ-ում հայտարարությունների ժամին հիշեցրել է, որ ԵԽԽՎ դիտորդների զեկույցում նշված է, թե ինչպես են Հայաստանում ընտրությունների ժամանակ իշխանությունները չարաշահել վարչական ռեսուրսը․ «Այնտեղ եղել են նաև դրվագներ Հայաստանում ժողովրդավարության վիճակի և այն մասին, թե ինչպես են իշխանությունները ճնշում իրենց քաղաքական ընդդիմախոսներին»։

«Այսօր ընդդիմադիր երեք ուժերի ղեկավարները գտնվում են ճաղերի հետևում․․․ Ինչո՞ւ են այս մարդիկ գտնվում ճաղերի հետևում։ Ինչո՞ւ է նախագահ Ռոբերտ Քոչարյանն արդեն չորրորդ անգամ կալանավորված․․․ Որովհետև այդ մարդիկ գործարքի չեն գնացել իշխանությունների հետ, որովհետև չեն պայմանավորվել։ Չպայմանավորվելու հետևանքով Ռոբերտ Քոչարյանը ճաղերի հետևում է, մեր գործընկեր Արթուր Սարգսյանը գտնվում է տնային կալանքի տակ, քրեական հետապնդում է իրականացվում Իգոր Սարգսյանի նկատմամբ»,- նշել է Խաչատրյանը՝ նաև ընդգծելով, որ իշխանությունների հետ որևէ պայմանավորվածություն չի եղել և չի լինելու, քանի որ Հայաստանի և հայության վերաբերյալ ընդդիմության պատկերացումները արմատապես տարբերվում են նրանց պատկերացումներից։