Եռակողմ բանակցություններում չի քննարկվի հրադադարի հարցը. կողմերը մեկնել են Աբու Դաբի

Ուկրաինայի բանակցային խումբը կգլխավորի Անվտանգության հատուկ ծառայության ղեկավար Ռուստեմ Ումերովը։ Նրա կազմում կլինեն նաև Զելենսկիի գրասենյակի ղեկավար Կիրիլո Բուդանովը, «Ժողովրդի ծառա» խմբակցության ղեկավար Դավիթ Արախամիան, Բուդանովի առաջին տեղակալ Սերգեյ Կիսլիցյան և Պաշտպանության նախարարության գլխավոր հետախուզական վարչության պետի տեղակալ Վադիմ Սկիբիցկին։ Ումերովը հայտարարել է, որ դիվանագետներն արդեն մեկնում են Աբու Դաբի։

Նա հավելել է, որ նույն օրերին Աբու Դաբիում կլինեն նաև Մեծ Բրիտանիայի, Ֆրանսիայի, Գերմանիայի, Իտալիայի, ինչպես նաև ՆԱՏՕ-ի և Եվրոպական հանձնաժողովի ներկայացուցիչները։

«Մենք առանձին համակարգող հանդիպումներ կանցկացնենք մեր եվրոպացի գործընկերների հետ։ Մեզ համար կարևոր է պահպանել սերտ համակարգումը մեր բոլոր հիմնական գործընկերների հետ՝ ապահովելով դիրքորոշումների համաձայնեցում և բանակցային գործընթացում հաջորդ քայլերի վերաբերյալ ընդհանուր ըմբռնում», - նշել է Ումերովը։

Euronews-ի փոխանցմամբ՝ ՆԱՏՕ-ն Աբու Դաբի կուղարկի գլխավոր քարտուղար Մարկ Ռյութեի աշխատակազմի ղեկավար Ջեֆրի վան Լյովենին։ Եվրոպական հանձնաժողովը կուղարկի Եվրոպական հանձնաժողովի նախագահի աշխատակազմի ղեկավար Բյորն Զայբերտին և Եվրոպական խորհրդի նախագահ Անտոնիո Կոստայի արտաքին քաղաքականության գլխավոր խորհրդական Աննա-Մարիա Բուրային: Ֆրանսիան, Գերմանիան և Մեծ Բրիտանիան առաջնորդներին կուղարկեն ազգային անվտանգության խորհրդականներ։

Ուրսուլա ֆոն դեր Լեյենը հաստատել է ԵՄ ներկայացուցիչների ժամանումը՝ հայտարարելով, որ հեռախոսազրույց է ունեցել Ուկրաինայի նախագահ Վլադիմիր Զելենսկու հետ։

ՏԱՍՍ-ի փոխանցմամբ՝ բանակցություններին մեկնել է նաև ռուսական պատվիրակություն: Այն կգլխավորի Պուտինի օգնական Վլադիմիր Մեդինսկին: Նրա կազմում կլինեն նաև փոխարտգործնախարարներ Սերգեյ Ռյաբկովը և Միխայիլ Գալուզինը, Գլխավոր շտաբի գլխավոր վարչության պետ Իգոր Կոստյուկովը և նրա տեղակալ Յուրի Ժիգարլովսկին։

Դոնալդ Թրամփի հատուկ դեսպանորդներ Սթիվ Ուիթքոֆը և Ջարեդ Քուշները կներկայացնեն Միացյալ Նահանգները: Նրանք կհանդիպեն եվրոպացի դիվանագետների հետ եռակողմ բանակցություններից առաջ։

Բանակցություններում չի քննարկվի հրադադարի հարցը, այլ կկենտրոնանան անվտանգության երաշխիքների վրա, գրում է The New York Times-ը։

Ռուսաստանի արտաքին գործերի նախարար Սերգեյ Լավրովը նշում է, որ կողմերը կքննարկեն «եվրոպական անվտանգության» հարցը. «Այն փաստը, որ ներկայիս բանակցողները, նախագահ Թրամփի հանձնարարությամբ, առաջարկել են կոլեկտիվ անվտանգության հարցը դնել ուկրաինական կարգավորման բանակցությունների առաջնային պլանում, իհարկե, ողջունելի է»։