«Յուրաքանչյուր բուհի համար պատիվ կլինի պարոն Մելիքյան դասախոս ունենալը»․ Արման Թաթոյան

«Միասնության թեւեր» կուսակցության առաջնորդ, ՀՀ նախկին ՄԻՊ Արման Թաթոյանը ֆեյսբուքյան էջում գրում է. «Ռուբեն Մելիքյանն իրական գիտնական է, մանկավարժ ու հայրենասեր մարդ, քրեական դատավարության լավագույն մասնագետներից:
Պարոն Մելիքյանը Հայաստանի քրեական դատավարությունում վերաքննիչ ու վճռաբեկ վարույթների, Վճռաբեկ դատարանի այսօրվա իրավաբանության, նախադեպային որոշումների համակարգի հիմնադիրներից է: Նա ԵՊՀ իրավագիտության ֆակուլտետում երկար տարիներ դասավանդվող «Իրավաբանական գիր և վերլուծություն» առարկայի երկու հիմադիրներից մեկն է: Բազմաթիվ գիտական հոդվածների ու մենագրության հեղինակ է:
Արցախի մարդու իրավունքների պաշտպանի պաշտոնում առաջին ու միակ Պաշտպանն էր, որ Արցախի անձնագրով (ոչ թե Հայաստանի կապույտ, այլ հենց Արցախի անձնագրով) մուտք գործեց Եվրախորհրդարան և այնտեղ հատուկ ասուլիս տվեց ադրբեջանական հանցանքների մասին: 2016թ. քառօրյա պատերազմից հետո Թալիշում հատուկ ասուլիսով զեկույց ներկայացրեց, որի հիման վրա նաև Մարդու իրավունքների եվրոպական դատարանը հունիսի 8-ի վճռով հաստատեց ադրբեջանական զինվորականների կողմից Հայկ Թորոյանին գլխատելու, դաժանաբար սպանելու փաստը: Վերջին տարիներին Հայաստանի լավագույն փաստաբաններից է: Նա այն բացառիկ դասախոսներից է, որ բարձր որակի իրավական գիտելիքներ փոխանցելուց բացի ուսանողներին տալիս է փիլիսոփայական պատկերացնումներ իրավունքի մասին, սովորեցնում է՝ ինչպես մեկնաբանել իրավունքը: Դասավանդում է նաև անգլերեն լեզվով:
Յուրաքանչյուր բուհի համար պատիվ կլինի պարոն Մելիքյան դասախոս ունենալը: Այս ամենը ինքս եմ տեսել, ինքս եմ ականտես եղել»։