«Ես քրեական գործերին, մեղադրանքներին գնահատական չեմ տալիս»․ Սուրեն Գրիգորյան

Ճեպազրույցի ժամանակ լրագրողը Երևանի փոխքաղաքապետ Սուրեն Գրիգորյանին խնդրեց գնահատական տալ քաղաքապետարանի տրանսպորտի վարչության պետ Վազգեն Հարությունյանի նկատմամբ մեղադրանք առաջադրվելու հանգամանքին։ «Ես քրեական գործերին, մեղադրանքներին գնահատական չեմ տալիս»,- պատասխանեց պաշտոնյան։

«Հատկապես վերջին շրջանում քաղաքապետարանում պարբերաբար լինում են այսպիսի դեպքեր, դա նորմա՞լ է»,- շարունակեց լրագրողը։ «Նորմալ է, երբ որ ժամանակ առ ժամանակ տարբեր անձանց ներկայացնում են մեղադրանքներ, որովհետև չեն լինում հասարակություններ, որոնցում չեն կատարվում հանցագործություններ։ Սա չի նշանակում, որ ասում եմ՝ պարոն Հարությունյանը կատարել է, թե չի կատարել, դուք ասում եք քրգործեր են լինում, մեղադրանքներ, ասում եմ՝ նորմալ է, ցանկացած ժողովրդավար երկրում, ցավոք սրտի, լինում են հանցագործություններ, որոնք բերում են մեղադրանքների ներկայացման, բայց լինում են նաև անհիմն մեղադրանքներ։

Պարոն Հարությունյանը կոնկրետ հայտարարել է, որ չի ընդունում իրեն առաջադրված մեղադրանքը և համարում է անհիմն»,- ասաց Սուրեն Գրիգորյանը։