Ցուցարարները Թեհրանում հրդեհել են ԻՀՊԿ-ի կենտրոնական շենքը

Իրանում շարունակվում են զանգվածային բողոքի ցույցերը: Սոցիալական ցանցերում և որոշ լրատվամիջոցներում շրջանառվող հաղորդագրությունների համաձայն՝ ցուցարարները Թեհրանում հրդեհել են Իսլամական հեղափոխության պահապանների կորպուսի կենտրոնական շենքը:

Մայրաքաղաքի մի քանի թաղամասերում, ըստ տեղեկությունների, փակ են փողոցները, ցուցարարները մեքենաներ են այրում, իսկ տարբեր քաղաքներում լսվում են կրակոցներ: Չհաստատված հաղորդագրությունների համաձայն՝ իշխանությունները լրացուցիչ ցամաքային ուժեր են տեղակայել ոստիկանությանը ուժեղացնելու համար:

Ավելին, կան հաղորդագրություններ ցուցարարների և անվտանգության ուժերի միջև բախումների, ինչպես նաև ոստիկանական մեքենաների հրդեհման մասին: Գորգան քաղաքում ցուցարարները փորձել են գրոհել նահանգապետի նստավայրը: Քարաջում, ըստ տեղեկությունների, անվտանգության ուժերը կրակ են բացել ցուցարարների վրա:

Ցուցարարները կարգախոսներ են բղավում գործող կառավարության դեմ:

Իրանցի պաշտոնյաները դեռևս չեն մեկնաբանել իրավիճակը: