Հակակոռուպցիոն կոմիտեն՝ «Հայրենիք» կուսակցության անդամների ձերբակալության մասին

Ինչպես ավելի վաղ հայտնել էինք, ձերբակալվել են «Հայրենիք» կուսակցության մի խումբ անդամներ, այդ թվում՝ գլխավոր քարտուղար Խաչիկ Գալստյանը։

Հակակոռուպցիոն կոմիտեից «Ֆակտոր»-ի հարցմանն ի պատասխան նշել են, որ Արմավիրի մարզի Վաղարշապատ համայնքում 2025 թվականի նոյեմբերի 16-ին համամասնական ընտրակարգով ավագանու ընտրություններին «Հայրենիք» կուսակցության պատասխանատու անձանց կողմից իրենց օգտին քվեարկելու դիմաց ընտրակաշառք տալու և նույն համայնքի բնակիչների կողմից ընտրակաշառք ստանալու դեպքերի առթիվ ՀՀ հակակոռուպցիոն կոմիտեում նախաձեռնված քրեական վարույթի շրջանակում օրերս ձերբակալվել է 8 անձ, այդ թվում՝ Արմավիրի մարզպետի նախկին տեղակալը։ «Ձերբակալված անձանցից մեկի նկատմամբ որպես խափանման միջոց է կիրառվել կալանքը, երեքի նկատմամբ՝ տնային կալանքը։ Նախօրեին նույն քրեական վարույթի շրջանակում կաշառք տալու մեղադրանքով ձերբակալվել է ևս երկու անձ, այդ թվում՝ նշված կուսակցության գլխավոր քարտուղարը: Վերջիններիս նկատմամբ կալանքը որպես խափանման միջոց կիրառելու միջնորդություններ են ներկայացվել դատարան»,- ասել է Կոմիտեի մամուլի քարտուղար Մարինա Օհանջանյանը։