Սաուդյան Արաբիան հայտարարել է Եմենի արևելքում գործողության ավարտի մասին

Սաուդյան Արաբիայի գլխավորած արաբական կոալիցիան հայտարարել է Եմենի արևելքում գտնվող Ալ-Մուքալլա նավահանգստում ռազմական գործողության ավարտի մասին։ «Ալ-Մուքալլա նավահանգստում իրականացված սահմանափակ ռազմական գործողությունն ավարտվել է, նավահանգստի աշխատանքը վերադարձել է իր բնականոն ընթացքին»,- ասվում է արաբական կոալիցիայի հայտարարության մեջ։

«Գործողության հետևանքով զոհեր չեն եղել»,- ասվում է հայտարարության մեջ։

Ավելի վաղ կոալիցիան հայտնել էր, որ գործողություն է իրականացնում Եմենի արևելյան Հադրամաութ նահանգի վարչական կենտրոն Ալ-Մուքալլա քաղաքի նավահանգստում՝ նախազգուշացնելով խաղաղ բնակիչներին նավահանգստից հեռանալու մասին։ Կոալիցիան ավելի ուշ տեղեկացրել էր, որ հարվածել է ԱՄԷ-ից ժամանած երկու նավի, որոնք ռազմական բեռ էին տեղափոխում Եմենի ռազմավարական նշանակություն ունեցող արևելյան նահանգներում իշխանությունը զավթած հարավային անջատողական ուժերի համար։