«Ադրբեջանը պատրաստվո՞ւմ է դուրս գալ ՀՀ օկուպացված տարածքներից»․ հարց՝ ադրբեջանցի փորձագետին

ՀՀ Սահմանադրությամբ Ադրբեջանի նկատմամբ տարածքային պահանջ կա, իսկ Ադրբեջանի Սահմանադրության մեջ նման պահանջ չկա։ Այս մասին այսօր լրագրողների հետ զրույցում ասաց ՆԱՏՕ ԽՎ Ռոուզ-Ռոթ սեմինարի շրջանակում Հայաստան ժամանած ադրբեջանցի փորձագետ Մուրադ Մուրադովը։ Նրա խոսքով դա խաղաղության պայմանագրի վերջնական ստորագրման միակ խոչընդոտն է։
Լրագրողի հարցին, թե երբ ադրբեջանական իշխանությունները խոսում են «Արևմտյան Ադրբեջանի» մասին, տարածքային պահանջ չէ՞, Մուրադովը պատասխանեց. ««Արևմտյան Ադրբեջան» ասելով նկատի ունենք, որ միմյանց տարածքային ամբողջականությունը պահպանում և հարգում ենք։ «Արևմտյան Ադրբեջանը» հասարակական կազմակերպություն է, որը ներկայացնում է մարդկանց շահերը, ովքեր ժամանակին ապրել են Հայաստանում, և դա վերաբերում է մշակութային ժառանգությանը ավելի շատ»:

Մուրադովը Բաքվում պահվող հայ գերիների մասով հայտնեց, որ մանրամասներ չի կարող տալ, որովհետև դեռ դատական փուլն է․ «Կան մեղադրյալներ, որոնք, ըստ Ադրբեջանի օրենքի օրինախախտ են համարվում, այդ իսկ պատճառով Բաքվում են պահվում»,- ասաց նա:

Հարցին՝ Ադրբեջանը պատրաստվո՞ւմ է դուրս գալ ՀՀ օկուպացված տարածքներից, Մուրադովը պատասխանեց․ «Երկու երկրները ճանաչում են տարածքային ամբողջականությունը, ժամանակի ընթացքում պետք է տեղի ունենա որոշակի ակնկալվների կամ տարածքների փոփոխություն»: