«Եվրոպական Միության առաջնորդները գիտեն, որ այդ կառույցի դռները միշտ փակ են լինելու Հայաստանի համար». Էդմոն Մարուքյան

ԼՀԿ ղեկավար Էդմոն Մարուքյանի ֆեյսբուքյան գրառումը․ «Գյումրիի ընտրությունների խլացնող աղմուկի պատճառով գուցե նկատած չլինեք, բայց Եվրոպական հանձնաժողովի նախագահ Ուրսուլա ֆոն դեր Լեյենը, Եվրոպական խորհրդի նախագահ Անտոնիու Կոշտան ու Եվրոպական միության արտաքին գործերի և անվտանգության քաղաքականության հարցերով բարձր ներկայացուցիչ Կայա Կալասը այդպես էլ չողջունեցին երկրորդ և վերջնական ընթերցմամբ ընդունված «Եվրոմիությանը Հայաստանի անդամակցության գործընթաց սկսելու մասին» օրինագիծը։ Լավ հասկանալով, որ գործընթացը ներքաղաքական էլեկտորալ նպատակներ ունի, ինչպես նաև այն, որ ՀՀ իշխանությունները պարզապես խաբում են՝ թե՛ Հայաստանի քաղաքացիներին, թե՛ Եվրոմիությանը։
Իսկ Գյումրիում «Եվրադաշինք»-ի՝ անցողիկ շեմը չհաղթահարելը միայն ապացուցեց, որ Հայաստանի Եվրոպական ապագան, մեղմ ասած, մշուշոտ է։
Մյուս կողմից էլ, Եվրոպական Միության առաջնորդները գիտեն, որ այդ կառույցի դռները միշտ փակ են լինելու Հայաստանի համար, ուստի չեն ցանկանում, ողջունելով օրինագիծը, կեղծ հույսեր արթնացնել մեր ժողովրդի մոտ»։