«Երբեմն պետք է դեղեր օգտագործել»․ Թրամփը՝ մաքսատուրքերի մասին

Նոր մաքսատուրքերն ամերիկյան տնտեսության դեղամիջոցն են, Սպիտակ տան փոխանցմամբ՝ այս մասին հայտարարել է ԱՄՆ նախագահ Դոնալդ Թրամփը։

Նախագահը հիմարություն է անվանել հարցը, թե որքանո՞վ, իր կարծիքով, անկում կապրեն ֆոնդային բորսաները՝ մաքսատուրքերի մասին լուրերի ֆոնին:

«Ես չեմ ուզում, որ ինչ-որ բան անկում ապրի: Բայց երբեմն պետք է դեղեր օգտագործել իրավիճակը շտկելու համար»,- ասել է ԱՄՆ նախագահը։

Թրամփն առանց անուններ տալու պատմել է, որ շփվել է տեխնոլոգիական խոշոր գործարարների հետ, ովքեր վստահեցրել են, որ աջակցություն կցուցաբերեն։

Նրա խոսքով՝ ողջ աշխարհում տարբեր երկրների ներկայացուցիչներ «գործարքներ կնքելու մեծ ցանկություն ունեն»։

Հարցին, թե հնարավո՞ր է զրոյացվեն ԵՄ-ի հետ մաքսատուրքերը, նախագահը պատասխանել է, որ եվրոպական երկրները «մեր հաշվին շատ են հարստացել», և նրանց հետ գործարք չի լինի, մինչև որ «տարեկան մեծ գումարներ չվճարեն մեզ»։

Հիշեցնենք, որ ԱՄՆ-ում և աշխարհի մի շարք խոշոր քաղաքներում բողոքի ցույցեր են. Թրամփը ներմուծման մաքսատուրքեր է սահմանել: