«Մտադիր եմ հացադուլը շարունակել ԱՄՆ դեսպանատան և ԵՄ գրասենյակի մոտ»․ Լևիկ Խաչատրյան

Ի պաշտպանություն Բաքվում անօրինաբար դատվող Ռուբեն Վարդանյանի, Արցախի մյուս ռազմաքաղաքական ղեկավարների և ադրբեջանական բանտերում պահվող ռազմագերիների ու քաղաքացիական անձանց՝ մարտի 3-ից ՄԱԿ-ի գրասենյակի առջև հացադուլ հայտարարած Լևիկ Խաչատրյանը երկու օր առաջ տեղափոխվել էր Հայաստանում ՌԴ դեսպանատան առջև, իսկ այսօր առավոտվանից արդեն Ֆրանսիայի դեսպանատան առջև է:

Խաչատրյանը հայտնել է, որ ակցիան մտադիր է շարունակել նաև Մինսկի խմբի համանախագահ ԱՄՆ դեսպանատան, այնուհետև ԵՄ գրասենյակի մոտ:

«Որոշեցի պայքարս շարունակել Մինսկի խմբում ընդգրկված երկրների՝ ԱՄՆ-ի, Ֆրանսիայի, Ռուսաստանի, դեսպանատների առջև, ուշադրություն գրավել, որպեսզի ավելի լուրջ վերաբերվեն այս ամենին:

Ադրբեջանը մեղադրանք է ներկայացրել, թե մեր գերիները ահաբեկիչներ են: Հետևաբար, հարց՝ Մինսկի խմբի համանախագահ երկրներին: Երբ նրանց ներկայացուցիչները այցելում էին Արցախ, հանդիպում ղեկավարների հետ, հետո գնում Ադրբեջան, նշանակում է՝ նրանք սկզբից ահաբեկիչների՞ն էին այցելում: Այս հարցին իրենք պետք է պատասխանեն: Ինձ թվում է, որ որպես գերտերություն Ռուսաստանը կարող է ճնշում գործադրել կամ իր հեղինակությունը գործադրել արդարությունը վերականգնելու համար: Ինչպե՞ս էին պայմանավորվել: Բոլոր գերիները պետք է ետ դառնան․․․ Պետք է այս հարցում բոլորը միավորվեն, բողոքի ակցիաներ անեն տարբեր երկրներում, Ադրբեջանի դեսպանատների առջև, որպեսզի աշխարհը ուշադրություն դարձնի»,- նշել է Խաչատրյանը։