«Մեղադրյալի աթոռին ոչ այնքան Էդգար Ղազարյանն էր, որքան խոսքի ազատությունը՝ մեր երկրում»․ Ռուբեն Մելիքյան

«Քննությունն ավարտվեց, որոշ ժամանակ էլ պետք է սպասենք, վաղը՝ ժամը 10․00-ին է լինելու որոշման հրապարակումը»,- այս մասին քաղաքական-հասարակական գործիչ Էդգար Ղազարյանի դեմ հարուցված գործով դատական նիստից հետո լրագրողների հետ զրույցում հայտնեց իրավապաշտպան Ռուբեն Մելիքյանը։

Նրա գնահատմամբ՝ հետաքրքիր նիստ է ընթացել, բովանդակային առումով հետաքրքիր քննարկում է ծավալվել։ «Մենք ներկայացրինք այս քրեական հետապնդման ողջ լրջությունը, որ սա անհատի նկատմամբ քրեական հետապնդումից զատ՝ բոլորովին նոր տեսակի քրեական հետապնդում է խոսքի ազատության նկատմամբ։ Այստեղ մեղադրյալի աթոռին ոչ միայն և ոչ այնքան Էդգար Ղազարյանն էր, որքան խոսքի ազատությունն էր՝ մեր երկրում։

Հույս ունենք, որ դատարանը հաշվի կառնի մեր կողմից ներկայացված փաստարկները»,- ընդգծեց Մելիքյանը։