«Մոնիթորինգի հարցը պետք է ներառվի անվտանգության երաշխիքների փաթեթում». Վլադիմիր Զելենսկի

Ուկրաինայի և Ռուսաստանի միջև հրադադարի ընթացքում մոնիթորինգի հարցը պետք է ներառվի անվտանգության երաշխիքների փաթեթում, մինչդեռ շփման գծում զորքերի ներկայությունը մնում է քննարկման փուլում։ Ըստ «ՌԲԿ-Ուկրաինա»-ի՝ այս մասին հայտարարել է Ուկրաինայի նախագահ Վլադիմիր Զելենսկին Գերմանիայի կանցլեր Ֆրիդրիխ Մերցի հետ մամուլի ասուլիսում։

Ուկրաինայի նախագահին հարցրել են շփման գծում ՆԱՏՕ-ի կամ Եվրոպայի ռազմական ներկայության հնարավորության մասին։ Ի պատասխան Զելենսկին նշել է, որ Ուկրաինան ներկայում անվտանգության երաշխիքները քննարկում է իր դաշնակիցների հետ։

«Իմ ուղերձը. մարտադաշտում ցանկացած քայլից առաջ և՛ զինվորականները, և՛ քաղաքացիական բնակչությունը պետք է հստակ հասկանան, թե ինչ են լինելու անվտանգության երաշխիքները։ Սա շատ կարևոր է»,- հավելել է նա։

Զելենսկին նաև ընդգծել է, որ Միացյալ Նահանգները ՆԱՏՕ-ի 5-րդ հոդվածի համարժեքը «ընկալում է»՝ որպես Ուկրաինայի անվտանգության երաշխիք, և աշխատանքներ են տարվում դրա հստակ ձևակերպման ուղղությամբ։ Նրա խոսքով՝ այս ուղղությամբ արդեն առաջընթաց է գրանցվել։

Պետության ղեկավարը պարզաբանել է, որ տեսել է զինվորականների կողմից պատրաստված մանրամասները և նշել, որ ներկայում ամեն ինչ շատ լավ տեսք ունի։ Հատուկ ուշադրություն պետք է դարձնել հրադադարի ընթացքում մոնիթորինգին. ով է այն իրականացնում, ինչ ձևաչափով և ինչ պատժամիջոցներ են կիրառվում խախտողների նկատմամբ, բացատրել է նախագահը։

«Հրադադարի ընթացքում շփման գծում գտնվող անձինք, ռազմական զորամիավորումները, տեխնոլոգիական մոնիթորինգը, թե՞ այս տարրերի համադրությունը, ներկայում որոշվում է ռազմական մասնագետների կողմից։ Ես կարծում եմ, որ նրանց պետք է հնարավորություն տրվի մասնագիտորեն կատարելագործելու այդ առաջարկները և ներկայացնելու լուծում», - հավելել է Զելենսկին։