Երևան`   +21 °C
Այսօր`   Ուրբաթ, 19 հուլիսի, 2019 թ.

«Ռուսերենն ունի կարևոր և առանձնահատուկ նշանակություն». ՀՀ վարչապետ

162
Երեքշաբթի, 02 հուլիսի, 2019 թ., 16:25
«Ռուսերենն ունի կարևոր և առանձնահատուկ նշանակություն». ՀՀ վարչապետ

Այսօր Մոսկվայի Լոմոնոսովի անվան պետական համալսարանի երևանյան մասնաճյուղի առաջին շրջանավարտներին դիպլոմների հանձնման արարողության ժամանակ ՀՀ վարչապետ Նիկոլ Փաշինյանը շնորհակալություն հայտնեց ՌԴ կառավարությանը համալսարանի բացման գործում ցուցաբերած աջակցության համար:

«Նման համալսարաններն իրենց հետ Հայաստան են բերում կրթության, գիտության, հետազոտության ոլորտում գոյություն ունեցող ահռելի մի փորձ: Այդ փորձից օգտվելը մեզ համար, մեր երիտասարդների համար բացառիկ հնարավորություն է»,- ասաց նա:

Վարչապետը ելույթի ընթացքում հիշեց իր՝ բազմիցս արած հայտարարությունն այն մասին, որ ՀՀ քաղաքացիները պետք է առնվազն մի քանի օտար լեզուների տիրապետեն. «Այդ շարքում ռուսերենն ունի կարևոր և առանձնահատուկ նշանակություն: Ես ուրախ եմ, որ Մոսկվայի պետական համալսարանի գործունեությունը Հայաստանում ոչ միայն հնարավորություն է տալիս հաղորդակցվել այն հսկայական փորձի հետ, որ իր հետ բերում է, այլև Հայաստանում ռուսերենի ընդլայնման և զարգացման նոր հարթակ է դառնում»,- ընդգծեց Նիկոլ Փաշինյանը:

Անդրադառնալով շրջանավարտներին՝ վարչապետն ասաց. «Սիրելի շրջանավարտներ, շնորհավորելով ձեզ, շատ կարևոր և սիմվոլիկ եմ համարում, որ ահա առաջին շրջանավարտներն իրենց դիպլոմները ստանում են նոր Հայաստանում: Այն փոփոխությունները, որ այսօր Հայաստանում տեղի են ունենում, տեղի են ունենում ձեր աջակցությամբ և ձեր մասնակցությամբ»:

2015 թվականին Երևանում իր գործունեությունն սկսած Մոսկվայի Մ. Լոմոնոսովի անվան պետական համալսարանի մասնաճյուղն այս տարի ավարտել է 42 շրջանավարտ: