Մինսկ-2019. Կիրակոսյանը կպայքարի ոսկե մեդալի համար, Սահակյանը՝ բրոնզե

Բելառուսի մայրաքաղաք Մինսկում ընթացող Եվրոպական խաղերում մեկնարկել է մրցումային երրորդ օրը։ Այսօր պայքարի մեջ են մտել սամբիստները։ Հայաստանն ունի 3 ներկայացուցիչ՝ Տիգրան Կիրակոսյանը (52 կգ), Արսեն Ղազարյանը (74 կգ) և Գրիգոր Սահակյանը (90 կգ)։

Տիգրան Կիրակոսյանը պայքարն սկսեց 1/4 եզրափակչից, որտեղ նրա մրցակիցն ուկրաինացի Ռոման Բրատչենկոն էր։

Հայ սամբիստը հաղթեց 7։0 հաշվով և դուրս եկավ կիսաեզրափակիչ, որտեղ առավելության հասավ Ռուսաստանի ներկայացուցիչ Անդրեյ Կուբարկովի նկատմամբ (3:3) և ոսկե մեդալի համար պայքարելու հնարավորություն ստացավ։ Եզրափակչում Կիրակոսյանի մրցակիցը լինելու է ադրբեջանցի Ագհասիֆ Սամադովը։

Գրիգոր Սահակյանը ևս մեկնարկեց վստահ հաղթանակով՝ 8։0 հաշվով առավելության հասնելով չեխ Միրոսլավ Վացեկի նկատմամբ։ Կիսաեզրափակչում Սահակյանը մրցեց Ռուսաստանի ներկայացուցիչ Սերգեյ Ռյաբովի հետ և պարտվեց 1։3 հաշվով: Սահակյանը կպայքարի բրոնզե մեդալի համար։

Արսեն Ղազարյանը 1/4 եզրափակչում մրցեց Ռուսաստանի ներկայացուցիչ Ստանիսլավ Սկրայբկինի հետ և 1։2 հաշվով պարտություն կրեց։ Ղազարյանը կմասնակցի սփոփիչ գոտեմարտի, որտեղ նրա մրցակիցը կլինի ադրբեջանցի Աբդուլա Աբդուլաևը: