Հայտնի են լողափնյա վոլեյբոլի Հայաստանի չեմպիոններն ու չեմպիոնուհիները

Երևանում ավարտվեց լողափնյա վոլեյբոլի Հայաստանի մինչև 17 տարեկան տղաների և աղջիկների առաջնությունը, որին մասնակցեցին 12 տղաների և 12 աղջիկների զույգեր: Առաջնության առաջին խաղային օրը թիմերը հանդես եկան օլիմպիական մրցակարգով, որից հետո հաղթող թիմերը մրցեցին ենթախմբերում:

Աղջիկների պայքարում եզրափակիչ խաղը կայացավ «Վան» (Մաթոսյան Օֆելյա/Կինդլովա Էլիշկա) և «Ավան» (Մելքումյան Դիանա/Պողոսյան Մերի) զույգերի մասնակցությամբ: Ավելի ուժեղ գտնվեցին «Ավան»-ը ներկայացնող զույգը՝ հաղթելով 2:0 հաշվով: 3-4 տեղերի համար մրցեցին ԽՄՕՄՄ և «Աբովյան» թիմերը։ Հաղթեց «Աբովյան»-ը ներկայացնող Բադասյան Աննա և Հայրապետյան Սոնա զույգը:

Տղաների եզրափակիչ հանդիպումը կայացավ «Արաբկիր» (Սամվել Ղասաբօղլյան/Խաչատուր Ասմարյան) և ԽՄՕՄՄ (Նազարյան Վահե/Խալաթյան Կարեն) զույգերի մասնակցությամբ: Գերլարված խաղում ավելի ուժեղ գտնվեցին «Արաբկիր»-ի տղաները՝ հաղթելով 2:1 հաշվով:

3-4 տեղերի համար մրցեցին «Արաբկիր-2» և ՄՍՀԿ թիմերի զույգերը։ Հաղթեցին Մխիթար Սեբաստացու կրթահամալիրը ներկայացնող տղաները (Հակոբյան Գագիկ/Պողոսյան Դավիթ)՝ 2:0 հաշվով:

Մրցանակային տեղեր գրաված թիմերը պարգևատրվեցին պատվոգրերով, մեդալներով և գավաթներով: Բոլոր մրցանակային տեղեր գրաված թիմերն իրավունք ձեռք բերեցին հանդես գալ հուլիսի 1-ից 3-ը Երևանում կայանալիք տղամարդկանց և կանանց լողափնյա վոլեյբոլի Հայաստանի առաջնությանը: