«Պետք է ավելի քիչ մտածել սխալների մասին և կենտրոնանալ ճիշտ որոշումների վրա»․ Արմեն Գյուլբուդաղյանց

Երևանի Վազգեն Սարգսյանի անվան «Հանրապետական» մարզադաշտում հունիսի 8-ին կայանալիք Եվրո-2020-ի ընտրական փուլի Հայաստան - Լիխտենշտեյն հանդիպմանն ընդառաջ Հայաստանի ազգային հավաքականի գլխավոր մարզիչ Արմեն Գյուլբուդաղյանցը խոսեց խաղից իր ակնկալիքների մասին․

«Մրցակցին ուսումնասիրել ենք, բավականին ուժեղ հավաքականի տպավորություն է թողել: Եթե նայեք իմ անցած աշխատանքային ուղուն, կտեսնեք, որ ես երիտասարդ ֆուտբոլիստներին միշտ տեղ եմ տալիս և կուզեմ, որ հավաքականում սերնդափոխություն լինի։ Դա չպետք է լինի արհեստական ձևով:

Պետք է չվախենալ, ազատ լինել ու պատասխանատվության մեծ զգացմամբ խաղալ՝ դրական արդյունքի հասնելու համար։ Դրա համար ավելի քիչ պետք է մտածել սխալների մասին և կենտրոնանալ ճիշտ որոշումների վրա»։

Անդրադառնալով ֆուտբոլիստներին՝ Գյուլբուդաղյանցը նշեց․ «Արազն իսկական պրոֆեսիոնալ է: Այն պահից, ինչ նա մնացել է առանց թիմի, մարզվում է անհատական ծրագրով, որպեսզի անպայման օգնի հավաքականին: Նա այն ֆուտբոլսիտներից է, ում հետ մարզվելով և խաղալով երիտասարդ ֆուտբոլիստները պետք է փորձ հավաքեն:

Յուրա Մովսիսյանը բուժվում էր Լեհաստանում։ Մի քանի ակումբների տարբերակներ կան, որոնք քննարկման փուլում են: Գևորգ Ղազարյանը ևս մի քանի տարբերակներ ունի, սակայն ցանկանում է խաղալ Պորտուգալիայում: Նրանք բոլորն էլ կենտրոնացած են հավաքականի առաջիկա երկու խաղերի վրա»։