Գլենդելում ավագ դպրոցի աշակերտներին, այդ թվում՝ հայերին, արգելել են ֆուտբոլ խաղալ

ԱՄՆ-ի Քալիֆորնիա նահանգի Գլենդել քաղաքի Հուվերի ավագ դպրոցում (Hoover High School) չեղարկել են ֆուտբոլային ամենամյա մարզական հանդիպումները, հաղորդում է CBS Los Angeles-ը:

Հեռուստաալիքի փոխանցմամբ՝ պատճառը դեռ ամսվա սկզբին նույն դպրոցում հայ և այլազգի երեխաների միջև տեղի ունեցած ծեծկռտուքն է եղել:

«Դպրոցի տարածքում տեղի ունեցած վերջին վիճաբանությանը տասնյակ աշակերտներ են մասնակցել: Դպրոցական խորհրդում շատերը կարծում են, որ զանգվածային ծեծկռտուքը տեղի է ունեցել հայկական և լատինամերիկյան ծագում ունեցող մարզիկ աշակերտների միջև»,- հայտնում է հեռուստաալիքը:

Աշնան գլխավոր սպորտային իրադարձության չեղարկման պատճառով դպրոցականները ցույցի են դուրս եկել: Դպրոցական խորհրդից հայտնել են, որ խաղերը չեղարկվել են անվտանգության նկատառումներով: