«Ի՞նչ իմաստ ունի նախապես հերթագրվելը, եթե պայմանավորված ժամին քաղաքացին չի սպասարկվելու». Կարեն Հեքիմյան

Հասարակական գործիչ Կարեն Հեքիմյանը ֆեյսբուքյան էջում գրել է․ «Ինչպե՞ս Անձնագրայինն իմ կյանքից մեկ ժամ խլեց:
Անձնագրայինում գործարք ունեի: Շուրջ մեկ ամիս առաջ հերթագրվեցի Միգրացիայի և քաղաքացիության ծառայությունում: Այսօր պայմանավորված ժամին այցելեցի Անձնագրայինի Շենգավիթի բաժին: Սպասում էի: Հետևում էի Շենգավիթի Անձնագրայինում ընթացող «իրադարձություններին»:
Մի կին բարձրաձայն դժգոհում էր իր նկատմամբ աշխատակիցների վերաբերմունքից: Աշխատակիցներն էլ բանուգործը թողած, բոլորով միասին և միաձայն պատասխանում էին կնոջը: Ի վերջո վերջինս գնաց, սակայն աշխատակիցները շարունակեցին բարձրաձայն քննարկել կնոջ հոնքերի լցվածության ձևն ու աստիճանը:
Թեպետ նախապես պայմանավորվածության ժամն արդեն անցել էր, սակայն հերթս չէր հասել: Դե, հոնքերի վերաբերյալ քննարկումն ավելի կարևոր էր: Մոտեցա առերևույթ իրեն որպես ղեկավար դրսևորող աշխատակիցներից մեկին: Մտահոգություն հայտնեցի: Ասացի՝ ի՞նչ իմաստ ունի նախապես հերթագրվելը, եթե պայմանավորված ժամին քաղաքացին չի սպասարկվելու: Առերևույթ իրեն որպես ղեկավար դրսևորող աշխատակիցն ասաց. «Սա է, երբ կանչենք այն ժամանակ էլ կգաք: Այսպես է և վերջ»: Այդ պահին պատուհաններից մեկի մոտ ռուսներ մոտեցան: Նրանցից մեկն աշխատակցին հարցրեց, թե արդյոք կարելի է փոխել սպասարկման համար նախապես ամրագրված ու հերթագրման կտրոնում արտացոլված ժամը և սպասարկվել հենց այս պահին: Ի զարմանս ինձ, աշխատակիցը դրական պատասխանեց և սկսեց սպասարկել ռուս տղամարդուն: Մի պահ տխրեցի: Ափսոսացի, որ ռուս չեմ, հետևաբար՝ զրկված եմ արտահերթ սպասարկվելու հնարավորությունից:
Պայմանավորված ժամից արդեն անցել էր շուրջ 20 րոպե: Ինձ չէին կանչում: Զանգահարեցի ՀՀ ներքին գործերի նախարարություն՝ 112: Նկարագրեցի իրավիճակը: Խոստացան լուծում գտնել:
Պայմանավորված ժամից անցել էր 27 րոպե: Ինձ կանչեցին: Հարցրեցի աշխատակցի անունը: Չցանկացավ ներկայանալ: Պնդեցի: Ասաց, որ Անին է: Ի դեպ, Շենգավիթի Անձնագրայինում որևէ մեկն անվանաքարտ (բեյջ) չուներ, հետևաբար վստահ չեմ, որ աշխատակցի անունն Անի էր: Ազգանվան մասին չեմ խոսում: Հազիվ անունն ասեց: Անին, ամենայն հավանականությամբ, ծամոն էր ծամում կամ ինչ-որ բան ուտում: Ամեն դեպքում, տհաճ էր այդօրինակ ձևաչափով սպասարկվելը: Անիին առաջարկեցի ֆիքսել, որ սպասարկվում եմ նախապես ամրագրված ժամից 27 րոպե անց: Ի պատասխան Անին զարմացավ, ասաց, որ նոր է եկել: Նա ավելացրեց, որ որևէ արտառոց բան չկա, իսկ 27 րոպեն ոչինչ է՝ «ինչ է եղել, որ»: Սպասարկվեցի: Շենգավիթի Անձնագրայինից դուրս գալուց հաշվեցի, որ վերջինս իմ կյանքից անիմաստ մեկ ժամ խլեց՝ գնալ, գալ, սպասել: ՀՀ ներքին գործերի նախարարությունից օպերատիվ արձագանք չեղավ: Չի էլ լինի, քանզի Շենգավիթի Անձնագրայինի պետը Նիկոլ Փաշինյանի ազգականն է:
Նկարում՝ Շենգավիթի Անձնագրայինի մուտքն է, որի հետիոտնային հատվածը վաղուց դարձել է պաշտոնյաների ավտոկայանատեղի»: