«Եթե մարդը, անկախ ազգությունից, ապրում և աշխատում է մեր երկրում, ինչո՞ւ չպետք է ՀՀ քաղաքացիություն ստանա»․ Թաթուլ Հակոբյան

Լրագրող Թաթուլ Հակոբյանի ֆեյսբուքյան գրառումը. «Հայաստան-Ռուսաստան հարաբերություններում շարունակվող լարվածությունն ու ճգնաժամը, որ առաջիկայում ավելի է խորանալու՝ պայմանավորված մի շարք գործոններով, չպետք է պատճառ դառնա Հայաստանում հաստատված ռուս ռելոկանտների նկատամամբ վատ վերաբերմունքի:
Նույնը մենք պետք է ակնկալենք ռուսական իշխանություններից՝ Ռուսաստանում հաստատված ազգությամբ հայերը չպետք է դառնան երկկողմ հարաբերություններում ստեղծված լարվածության «զոհերը»:
Ամեն մեկն իրավունք ունի ապրելու այնտեղ, որտեղ ուզում է: Ես իրավունք ունեմ հենց վաղը տեղափոխվել Սան Ֆրանցիսկո, Սիդնեյ կամ Սամարա: Մարդիկ ինչ-ինչ պատճառներով հեռացել են հայրենիքից և իրավունք ունեն հեռանալ:
Բայց երբ այսօր նայում ենք մեր աշխատաշուկային, տեսնում ենք, որ մոտ 100 հազար օտարազգիներ աշխատում են Հայաստանում: Մեր գյուղի դպրոցի շինարարության վրա աշխատում եմ, օրինակ, պարսիկներ, քանի որ այդքան ազատ հայ տղամարդ չկա: Նույնը հարևան գյուղերում և ՀՀ բազմաթիվ վայրերում:
Ռուսները, հնդիկները, արաբները, պարսիկները զբաղեցնում են մեր աշխատաշուկայի մի մեծ հատված: Սա նշանակում է, որ եթե մեր երկրում այդքան հայեր լինեին՝ նկատի ունեմ աշխատող ձեռքեր, ապա նրանք կարող էին այդ գործը անել: Իսկ 100 հազարը նշանակում է այդքան ընտանիք, այսինքն՝ մինչև 400 հազար մարդ կարող է Հայաստանը հյուրընկալել կամ ներգաղթ ունենալ:
Այո, հեշտ չէ Հայաստանում աշխատելը, բայց սա է մեր երկիրը: Երկրորդը չունենք:
Ես միշտ մտածել եմ, որ եթե հայերը չեն ցանկանում ապրել մեր երկրում և նախընտրում են այլ պետություններ, ապա ճիշտ կլինի հեշտացված կերպով քաղաքացիություն տրվի ռուսներին, արաբներին, պարսիկներին, հնդիկներին:
Եթե մարդը, անկախ ազգությունից, ապրում և աշխատում է մեր երկրում, եթե հարկեր է վճարում, եթե իր երեխային հայկական բանակ է ուղարկում, ապա ինչո՞ւ չպետք է նրանց հնարավորություն տրվի ստանալ ՀՀ անձնանագիր և քաղաքացիություն»: