«Սպիտակ տունը հասկանում է Թրամփի հայտարարության «պրոբլեմատիկությունը»». Հակոբ Բադալյան

Քաղաքական մեկնաբան Հակոբ Բադալյանի թելեգրամյան գրառումը. «Տարօրինակ Թրամպն ու Սպիտակ տունը:

Սպիտակ տունը հայտարարել է, թե «անվերապահ կապիտուլյացիա» նշանակում է, որ նախագահը ինքը կորոշի, թե երբ է, որ Իրանն արդեն չի ներկայացնում սպառնալիք:

Սպիտակ տան այս պարզաբանումը հաջորդում է Թրամպի հայտարարությանը, թե չի ընդունի ոչ մի այլ պայմանավորվածություն, Իրանի «անվերապահ կապիտուլյացիայից» բացի: Թրամպի ահա այդ հայտարարությունից հետո Սպիտակ տունը տարածում է պարզաբանում, թե ինչ է նշանակում «անվերապահ կապիտուլյացիա»:

Իսկ պարզաբանման հանգամանքը վկայում է, որ Սպիտակ տունը հասկանում է Թրամպի հայտարարության «պրոբլեմատիկությունը»: Որովհետեւ «անվերապահ կապիտուլյացիան» կարծես թե բոլոր ողջախոհ, բանական մարդկանց մոտ ունի մեկ ասոցիացիա կամ ընկալում՝ երբ դիմացինը պարզապես հանձնվում է մյուսի «ողորմածությանն» ու տնօրինմանը:

Մինչդեռ, այն, ինչ պարզաբանում է արդեն Սպիտակ տունը՝ Թրամպից հետո, ունի բացարձակապես այլ իմաստ. նախագահն ինքը կորոշի, թե երբ Իրանը չի ներկայացնում այլեւս սպառնալիք: Իսկ դա նշանակում է, որ Թրամպը օրինակ վաղը կարող է հայտարարել, թե Իրանն այլեւս չի ներկայացնում որեւէ սպառնալիք, որովհետեւ բոլոր կարողությունները ոչնչացված են:

Հասկանում եք, թե ինչ սկզբունքային տարբերություն կա «անվերապահ կապիտուլյացիա» արտահայտության տրամաբանական ընկալման, ու Սպիտակ տան պարզաբանման միջեւ: Իսկ դա հետաքրքիր է, որ Թրամպի այդ հայտարարությունից հետո Սպիտակ տունը որոշում է «լղոզել» այն»: