«Որոշումները պետք է կայացնի Իրանի ժողովուրդը». Կայա Կալաս

Դժվար է կանխատեսել Իրանում զանգվածային բողոքի ցույցերի արդյունքը, բայց Բրյուսելը կշարունակի աջակցել երկրի քաղաքացիական հասարակությանը, Գերմանիայում կայացած մամուլի ասուլիսում ասել է եվրոպական դիվանագիտության ղեկավար Կայա Կալասը։

Նրա ելույթի ձայնագրությունը հրապարակվել է ԵՄ Եվրոպական արտաքին գործողությունների ծառայության կայքում։

Կալասին հարցրել են, թե արդյոք նա համաձայն է Գերմանիայի կանցլերի այն գնահատականի հետ, որ Թեհրանում ռեժիմի անկումը կարող է լինել մի քանի օր կամ շաբաթ հետո։ «Ոչ ոք չգիտի, թե ինչ կբերեն առաջիկա օրերն ու շաբաթները»,- պատասխանել է Կալասը։ Նա որպես օրինակ՝ բերել է Սիրիայում Բաշար ալ-Ասադի ռեժիմի անկումը, որը բոլորին անակնկալի է բերել։

«Շատ հաճախ նման ռեժիմները շատ, շատ դիմացկուն են։ Ճշմարտությունն այն է, որ մենք չգիտենք։ Մենք շարունակում ենք աջակցել քաղաքացիական հասարակությանը և նոր պատժամիջոցներ կիրառել նրանց նկատմամբ, ովքեր բռնություն են կիրառում խաղաղ ցուցարարների նկատմամբ»,- շարունակել է Կալասը։

«Բայց, վերջին հաշվով, որոշումները պետք է կայացնի Իրանի ժողովուրդը»,- եզրափակել է նա։