Լուվրում բլոգերներին հաջողվել է իրենց նկարը կախել «Մոնա Լիզայի» կողքին

Բելգիացի TikToker-ներ Նիլին և Սեննեին հաջողվել է շրջանցել Լուվրի անվտանգության համակարգը և թանգարան ներս բերել իրենց իսկ նկարը։ Նրանք այն կախել են մի սենյակում, որտեղ գտնվում է Լեոնարդո դա Վինչիի «Մոնա Լիզա» կտավը, և որոշ ժամանակ թանգարանի աշխատակիցները տեղյակ չեն եղել նոր «ցուցանմուշի» մասին։

Նրանք օգտագործել են Lego-ի աղյուսներից պատրաստված շրջանակ՝ մետաղորսիչ սարքերը շրջանցելու համար։ Չնայած նրանց պայուսակների խուզարկությունը տևել է սովորականից ավելի երկար, անվտանգության աշխատակիցները չեն անհանգստացել դրանց պարունակությունից։

Որոշ ժամանակ սենյակով անցնող անվտանգության աշխատակիցները խոչընդոտել են նրանց ծրագրին, բայց երբ թանգարանն սկսել է փակվել, և այցելուներին խնդրել են հեռանալ, TikToker-ները կարողացել են իրենց նկարը կախել 16-րդ դարի վենետիկցի վարպետների ստեղծագործությունների շարքում և հանգիստ լքել թանգարանը՝ մի քանի լուսանկարներ անելով։

Հաջորդ օրը պարզվել է, որ նրանց դիմանկարը որոշ ժամանակ մնացել է պատին՝ շարունակելով զարմացնել և զվարճացնել Լուվրի այցելուներին։

Հիշեցնենք, որ հոկտեմբերի 19-ին հանցագործները Լուվրի թանգարանից՝ Նապոլեոնի և նրա կնոջ հավաքածուից ինը ցուցանմուշ էին գողացել։