Ադրբեջանը տարեկան 1.2 միլիարդ խորանարդ մետր գազ կարտահանի Սիրիա

Ադրբեջանը տարեկան 1,2 միլիարդ խորանարդ մետր գազ կմատակարարի Սիրիային՝ Շահ-Դենիզ գազի հանքավայրից։ Այս մասին Reuters գործակալությանը հայտնել է Ադրբեջանի պետական էներգետիկ SOCAR ընկերության փոպնախագահ Էլշատ Նասիրովը: Նա ելույթ է ունեցել Թուրքիայից և Ադրբեջանից դեպի Սիրիա բնական գազի արտահանման մեկնարկի արարողության ժամանակ:

Կապույտ վառելիքը թուրքական սահմանային Քիլիս քաղաքով կհասցվի Հալեպի և Հոմսի էլեկտրակայաններ, որտեղ այն կօգտագործվի էլեկտրաէներգիա արտադրելու համար:

Ադրբեջանի էկոնոմիկայի նախարար Միքայել Ջաբբարովը հայտարարել է, որ ծրագիրը Ադրբեջանի նախագահ Իլհամ Ալիևի և Սիրիայի ժամանակավոր նախագահ Ահմադ Ալ-Շաարիի միջև ապրիլին և հուլիսին ձեռք բերված պայմանավորվածությունների արդյունք է։

«Սիրիա գազի արտահանում սկսելով՝ Ադրբեջանը ցույց է տվել, որ ունակ է գազ արտահանել ոչ միայն Արևմուտք, այլ նաև Արևելք և Հարավ», - ասել է նա միջոցառման ժամանակ։