Հութիները սպառնացել են հարվածել ամերիկյան նավերին՝ ի պաշտպանություն Պաղեստինի

«Անսար Ալլահ» շարժումը կհարվածի ամերիկյան առևտրային ընկերությունների նավերին, եթե նրանք համագործակցեն Իսրայելի նավահանգիստների հետ, РИА Новости-ի փոխանցմամբ՝ հայտնել է խմբի քաղբյուրոյի անդամ Մուհամմադ ալ-Բուհեյտին։

«Ի պաշտպանություն Պաղեստինի ժողովրդի՝ մենք ստիպված ենք ընդլայնել մեր գործողություններն Իսրայելի հետ համագործակցող միջազգային ընկերությունների, այդ թվում՝ ամերիկյան նավերի դեմ՝ Գազայի հատվածի շրջափակումը վերացնելու և զանգվածային ցեղասպանությունը դադարեցնելու պահանջով»,- ասել է նա։

Ըստ գործակալության աղբյուրի՝ սա չի խախտում Միացյալ Նահանգների հետ հրադադարի համաձայնագրերը, որոնք շարժումը պահպանում է։ Ալ-Բուհեյտիի խոսքով՝ ամերիկյան նավերի վրա նախորդ հարձակումները 2024 թվականի սկզբին Եմենի դեմ ագրեսիայի պատասխանն էին և կապված չէին Գազայի հատվածում տիրող իավիճակի հետ։

Կիրակի հութիների ռազմական թևի ներկայացուցիչը հայտարարել էր, որ խմբավորումը կհարձակվի Իսրայելի նավահանգիստների հետ համագործակցող ցանկացած ընկերության նավերի վրա՝ անկախ նավերի ուղղությունից և այն երկրից, որին դրանք պատկանում են։