«Իշխանափոխությունից հետո միակ վայրը, ուր Ալեն Սիմոնյանը կարող է ապրել, Բաքուն է»․ Իշխան Սաղաթելյան

«Անհայրենիք, անսրբություն անձի ձևակերպումներ են»,- լրագրողների հետ զրույցում ասաց ԱԺ «Հայաստան» խմբակցության պատգամավոր, ՀՅԴ-ական Իշխան Սաղաթելյանը՝ անդրադառնալով Նիկոլ Փաշինյանի՝ Սարդարապատի հուշահամալիրում ունեցած ելույթին։ «Իր իշխանության տարիներին ՀՀ ինքնիշխանության մակարդակն իջել է պլինտուսի աստիճան։ ՀՀ տարածքային ամբողջականությունը խաթարված է, հետևաբար ինքը հայրենիքից, պետականությունից խոսելու իրավունք չունի»,-նշեց Սաղաթելյանը՝ հավելելով, որ այս իշխանության մնալու դեպքում մեր ազգային տոները չեն նշվելու, ինչպես չնշվեց Արցախի անկախության օրը։
Դիտարկմանը, թե Ալեն Սիմանյանն ասել էր, որ խաղաղության պայմանագրի կնքումից հետո հայերը կկարողանան ապրել Բաքվում, իսկ ադրբեջանցիները վերադառնալ հայկական գյուղեր, Սաղաթելյանն ասաց․ «Իշխանափոխությունից հետո միակ վայրը, ուր Ալեն Սիմոնյանը կարող է ապրել՝ Բաքուն է, երևի իր ապագայի մասին է խոսում»։