Սլովենիայում գողացել են Թրամփի կնոջ` Մելանիայի բրոնզե արձանը

ԱՄՆ-ի նախագահ Դոնալդ Թրամփի կնոջ՝ Մելանիայի բրոնզե արձանը, որը տեղադրված էր Սլովենիայում, անհետացել է, և ոստիկանությունը հետաքննություն է սկսել միջադեպի կապակցությամբ, հաղորդում է Agence France-Presse-ը՝ հղում անելով տեղական ոստիկանությանը։
Գործակալությունը հիշեցնում է, որ սկզբում Մելանիայի հայրենի Սևնիցայում նրա պատվին փայտե արձան էր կանգնեցվել։ Արձանը հետագայում վնասվել էր հրդեհի ժամանակ, և 2020 թվականին պատրաստվել է բրոնզե պատճենը։ «Ոստիկանության և բրոնզե արձանի հեղինակ՝ ամերիկացի քանդակագործ Բրեդ Դաունիի տվյալներով՝ արձանը կտրել են կոճերից և տարել»,- հաղորդում է France Presse-ը։
Նշվում է, որ Մելանյա Թրամփի բրոնզե արձանը գտնվում էր մասնավոր տարածքում՝ ցանկապատված։
«Գողության մասին հաղորդվել է մայիսի 13-ին, և ոստիկանության աշխատակիցները անմիջապես մեկնել են հանցագործության վայր և սկսել հետաքննությունը», - հինգշաբթի օրը AFP-ին ասել է ոստիկանության մամուլի խոսնակ Ալենկա Դրենիկ Ռանգուսը։