«Մարիխուանան Հայաստանում պետք է օրինականացնել»․ Ալեն Սիմոնյան

«Համարում եմ, որ դա նույնպես կոնտրոլի կարիք ունի, բայց կոնտրոլը աչքերը փակելը չի ու ջայլամի քաղաքանությունը չի»,- «deep talks»-ի «Խորքային հարցազրույցում» ասել է ՀՀ ԱԺ նախագահ Ալեն Սիմոնյանը՝ անդրադառնալով հարցին, թե ինչպես է վերաբերվում մարիխուանայի օգտագործմանը։

Դիտարկմանը, որ ժամանակին կարծիք է հայտնել, թե մարիխուանայի օգտագործումը պետք է օրինականացվի, Սիմոնյանը նշեց․ «Ես հիմա էլ եմ համարում, որ պետք է օրինականացնել»։

Հարցին, թե այդ դեպքում ինչո՞ւ գործընթաց չի սկսում, Սիմոնյանը պատասխանեց․ «Որովհետև չեմ կարողանում մարդկանց համոզել»։

ԱԺ նախագահի կարծիքով՝ օրինականացնելով՝ հնարավոր կլինի կոնտրոլ անել՝ վերահսկել պրոցեսը։

«Հայաստանում մարիխուանա կա, օրինական չի, և դա շատ ավելի մեծ ռիսկեր է պարունակում․․․ Ակնհայտ է, որ աշխարհը գնում է նրան, որ դա բոլոր երկրներում օրինականանա, ամեն տարի մեկ-երկու երկիր օրինականացնում է․․․ Կգա ժամանակ, որ մարիխուանան կօրինականացվի նաև ՀՀ-ում»,- նշել է Սիմոնյանը՝ հավելելով, որ ինքը ևս մարիխուանա օգտագործել է։