«Բրիտանիան ինչ-որ բան է ակնկալում Ադրբեջանից». Հակոբ Բադալյան

Քաղաքական մեկնաբան Հակոբ Բադալյանի ֆեյսբուքյան գրառումը. «Իլհամ Ալիևի օգնական Հիքմեթ Հաջիևը Լոնդոնում հանդիպել է Մեծ Բրիտանիայի Պաշտպանության նախարարության պետական նախարար Վերնոն Կոկերին, իսկ հետո սոցցանցում շնորհակալություն հայտնել նրան՝ ջերմ ընդունելության համար:

Հաջիևը Ադրբեջանում թերևս ավելին է, քան պաշտպանության և նույնիսկ արտաքին գործերի նախարարները: Ռազմա-քաղաքական իմաստով նա անմիջականորեն Ալիևի ներկայացուցիչն է, հետևաբար, երբ հանդիպումները տեղի են ունենում նրա մակարդակում, դա թերևս նշանակում է, որ դրանց բովանդակությունը Իլհամ Ալիևի համար ունի առանձնահատուկ նշանակություն:

Թե ինչ բովանդակությամբ է Հաիջևը Լոնդոնում «ջերմ հյուրընկալվել» պաշտպանության նախարարությունում, մանրամասներ չեն նշվում: Նկատենք, որ այդ հանդիպումը տեղի է ունենում Ալիևի Անկարա այցից հետո: Բացառված չէ, որ Անկարայում Էրդողանը նրան է փոխանցել որոշակի բովանդակություն իր և Բրիտանիայի վարչապետ Սթարմերի հեռախոսազրույցից, որ տեղի ունեցավ փետրվարի 28-ին: Էրդողանից ստանալով այդ հաղորդագրությունները՝ Իլհամ Ալիևը գուցե որոշել է դրանք անմիջականորեն քննարկել կամ այսպես ասած ճշգրտել Լոնդոնի հետ:

Բրիտանիան ինչ որ բան է ակնկալում Ադրբեջանից, դա ակնառու է վաղուց: Ես այդ մասին խոսում եմ դեռևս ադրբեջանական օդանավի աղետից հետո, կապված աղետի քննության և այն Ռուսաստանի դեմ միջազգային իրավական գործընթացի վերածելու ակնկալիքի հետ:

Բայց, Լոնդոնի ակնկալիքներն ըստ ամենայնի չեն սահմանափակվում դրանով:

Հարցն այն է, որ խնդիրը ուրիշ է՝ պարտադրել ԱՄՆ, Ռուսաստան, Չինաստան եռյակին՝ աշխարհակարգի շուրջ քննարկումներում հաշվի նստել Բրիտանիայի հետ այնպես, ինչպես հաշվի են նստում միմյանց հետ»: