Մակրոնը և Սթարմերը հրավիրված են Սպիտակ տուն․ #euronews

ԱՄՆ ազգային անվտանգության հարցերով խորհրդական Մայք Ուոլցը հայտարարել է, որ Եվրոպայի երկու միջուկային տերությունների առաջնորդները հաջորդ շաբաթ կայցելեն Վաշինգթոն՝ քննարկելու ռուս-ուկրաինական պատերազմի ավարտը։

«Ֆրանսիայի նախագահ Էմանուել Մակրոնի դիվանագիտական ​​մարաթոնն սկսել է արդյունք տալ։

Մոսկվայի և ԱՄՆ-ի միջև մերձեցմանը միասնական պատասխան տալու նպատակով շաբաթվա սկզբին Փարիզում ԵՄ և ՆԱՏՕ-ի երեք տասնյակ առաջնորդների խորհրդակցությունների երկու փուլից հետո Եվրոպան վերջապես ապահովեց իր տեղը բանակցությունների սեղանի շուրջ», գրում է euronews-ը:

Ըստ լրատվամիջոցի՝ Ելիսեյան պալատում կազմակերպված 19 պետությունների ղեկավարների երկրորդ հանդիպումից հետո ԱՄՆ նախագահի ազգային անվտանգության հարցերով խորհրդական Մայք Ուոլցը հայտարարեց, որ նախագահ Մակրոնը և Մեծ Բրիտանիայի վարչապետ Քիր Սթարմերը հաջորդ շաբաթվա սկզբին հրավիրված են Սպիտակ տուն՝ քննարկելու ուկրաինական պատերազմը։

Սաուդյան Արաբիայում Ռուսաստանի և ԱՄՆ պատվիրակությունների միջև բանակցություններից հետո եվրոպական առաջնորդների հիմնական մտահոգություններից մեկն այն էր, որ Թրամփը կարող է համաձայնության գալ Մոսկվայի հետ, որը հաշվի չի առնի ո՛չ Կիևի, ո՛չ էլ միասնական Եվրոպայի անվտանգության շահերը: