Պուտինն ափսոսում է, որ պատերազմն ավելի շուտ չի սկսել

«Հատուկ ռազմական գործողությունը» (ինչպես Ռուսաստանի իշխանություններն անվանում են պատերազմն Ուկրաինայի դեմ-խմբ.) պետք է սկսվեր ավելի վաղ՝ մինչև 2022 թվականը։ Այս մասին դեկտեմբերի 19-ին հայտարարել է ՌԴ նախագահ Վլադիմիր Պուտինը։

«Եթե հնարավոր լիներ գնահատել իրավիճակը 2022 թվականին՝ հիմնվելով այսօրվա գիտելիքների վրա, ես կգայի այն եզրակացության, որ որոշումը պետք է կայացվեր ավելի վաղ»,- նշել է Պուտինը։

Նա չի հստակեցրել, թե կոնկրետ երբ պետք է սկսվեր «հատուկ գործողությունը»։ Բայց նա ընդգծել է, որ Մոսկվան պետք է «ավելի մանրակրկիտ պատրաստվեր» նման ռազմական գործողություններին։

Պուտինն անդրադարձել է նաև Ուկրաինայի հետ հնարավոր խաղաղ բանակցությունների թեմային։ Նրա խոսքով, Ռուսաստանը ոչ մի նախապայման չի առաջադրում երկխոսության մեկնարկի համար, սակայն բանակցությունները պետք է հիմնվեն հակամարտության առաջին շաբաթներին Ստամբուլում քննարկված համաձայնագրերի նախագծերի վրա։

Սա սկզբունքորեն հակասում է Պուտինի՝ այս տարվա հունիսին արված հայտարարություններին։ Այն ժամանակ ՌԴ նախագահը հայտարարել էր, որ խաղաղ բանակցությունների համար նախապայման է լինելու Ուկրաինայի չորս շրջանների՝ Դոնեցկի, Լուգանսկի, Զապորոժիայի և Խերսոնի շրջանների տարածքը իրենն վարչական սահմաններով Ռուսաստանին հանձնելը։

Պուտինը նշել է, որ Ռուսաստանն «առնվազն երեք անգամ համաձայնել է գործարքներ կնքել Կիևի հետ, բայց Ուկրաինան միշտ խափանել է դրանք»։ Ուկրաինայի ղեկավարությունը հերքում է այս հայտարարությունները՝ նշելով, որ խաղաղ գործընթացի հիմնական խոչընդոտը հենց Մոսկվայի վերջնագրային պայմաններն են։

Պուտինը պատրաստակամություն է հայտնել փնտրել փոխզիջումներ և առաջարկել է ԱՄՆ-ի նորընտիր նախագահ Դոնալդ Թրամփի մասնակցությունը բանակցային գործընթացին։ Սակայն Ռուսաստանը պատրաստ չէ Կիևին վերադարձնել օկուպացված տարածքները և պնդում է, որ Ուկրաինան հրաժարվի ՆԱՏՕ-ին անդամակցելու մտադրություններից։

Նախագահը նաև հավելել է, որ հրադադարի մասին համաձայնագիր կարող է կնքվել միայն «Ուկրաինայի օրինական իշխանությունների» հետ. Պուտինն այդպիսին է համարում միայն Գերագույն Ռադան։ Վլադիմիր Զելենսկին, ըստ Ռուսաստանի առաջնորդի, այժմ կորցրել է Ուկրաինայի նախագահի իր լեգիտիմությունը։

Ուկրաինայում նախագահական ընտրությունները չեղարկել են այս տարվա մայիսին՝ պատճառաբանելով ռազմական դրությունը։