Անահիտ աստվածուհու արձանի գլուխն ու ձեռքը կցուցադրվեն Երևանում

Կառավարությունը 5 մլն 700 հազար դրամ կհատկացնի Հայաստանի պատմության թանգարանում «Մայր աստվածություն․ Անահիտից Մարիամ» ժամանակավոր ցուցադրության հանրահռչակման համար: Որոշումն ընդունվեց այսօր՝ կառավարության նիստի ժամանակ։

Բրիտանական թանգարանի մշտական ցուցադրության մեջ ներկայացված Սատաղղից գտնված և Անահիտ աստվածուհուն վերագրվող հայտնի բրոնզե արձանից պահպանված գլուխն ու ձեռքը կցուցադրվեն Հայաստանի պատմության թանգարանում:

Ցուցահանդեսի բացումը նախատեսված է 2024 թվականի սեպտեմբերի 21-ին՝ Հայաստանի անկախության օրվա տոնական միջոցառումների շրջանակում:

Ակնկալվում է, որ ցուցադրության վեց ամիսների ընթացքում թանգարանը կունենա նվազագույնը 300 հազ․ այցելու, իսկ հանրահռչակման արդյունքում՝ 800 հազ․-1մլն․ մարդ տեղեկացված կլինի ցուցահանդեսի մասին: