Հասարակական գործիչ Կարեն Հեքիմյանի ֆեյսբուքյան գրառումը․ «Տիեզերական կապավորը․ Նախկին ոստիկանապետ Գասպարյան Վովան նախկին ոստիկանապետ Վալերի Օսիպյանին «մեր կապավորն է» անվանում: Լավ չհասկացա, թե ասելով «մեր» ում նկատի ունի Գասպարյան Վովան: Ովքե՞ր են «իրենք»: Եվ, այսպես՝ Գասպարյան Վովան ծնվել է Էստոնիայում՝ Տալլիննում, 31 (՞) տարեկանում ավարտել է Վոլգոգրադի քննչական դպրոցը: ՀՀՇ-ի իշխանության տարիներին հաջողությամբ համատեղել է ոստիկանությունում աշխատանքը և ... քաղաքականությունը (՞)՝ եղել է ՀՀ ԳԽ պատգամավոր: Քոչարյան Ռոբերտի իշխանության տարիներին Գասպարյան Վովան ՀՀ գլխավոր ռազմական ոստիկանն էր, Սարգսյան Սերժի օրոք՝ ոստիկանապետ, Հովհաննիսյան Րաֆֆիի օրոք՝ հավատացյալ: Հպանցիկ ուսումնասիրելով վերջինիս կենսագրությունը վստահաբար կարելի է պնդել, որ Գասպարյան Վովային հաջողվել է միմյանց «կապել» անտագոնիստներին (ախոյաններին), օրինակ՝ Տալլինն ու Վոլգոգրադը, քաղաքականությունն ու ոստիկանությունը, Տեր-Պետրոսյան Լևոնին ու Քոչարյան Ռոբերտին, Սիրադեղյան Վանոյին ու Սարգսյան Սերժին, իրեն և Հովհաննիսյան Րաֆֆիին: Փաշինյան Նիկոլի օրոք Գասպարյան Վովան առերևույթ «կապելով» զբաղված չէ, սակայն ո՞վ գիտի ... Դեռ երեկո չէ: Եվ, միգուցե մենք դեռ ականատես կլինենք, թե ինչպես են միմյանց «կապվում», օրինակ՝ Սարգսյան Սերժն ու Փաշինյան Նիկոլը կամ Փաշինյան Նիկոլն ու Կարապետյան Կարենը: Լավ կլինի, որ Գասպարյան Վովայի միջնորդությամբ Երկիրը Վեներայի հետ «կապվի»: Որոշ անձանց համար չպետք է անտեսել նաև Պլուտոնի և Մերկուրիի հետ «կապվելու» նպատակահարմարությունը:
