«Այլ հերոսներ փնտրեք, Հայաստանում ինչքան քննիչ կա, զբաղվում է Քովիդ-19-ով»․ Արսեն Թորոսյանը՝ Արծվիկ Մինասյանին

«Ուզում եմ կոչ անել այլ հերոսներ փնտրել և Հանրային խորհրդի մասին օրենքի քննարկման ժամանակ նորից Քովիդ 19-ը չհիշել»,- այս մասին ԱԺ-ում ելույթ ունենալով՝ նշեց ՔՊ-ական պատգամավոր Արսեն Թորոսյանը։

Հիշեցնենք, որ «Հայաստան» խմբակցության պատգամավոր Արծվիկ Մինասյանը Հանրային խորհրդի մասին օրենքում փոփոխություններ և լրացումներ կատարելու նախագծի քննարկման ժամանակ նշել էր․ «Չափազանց սահմանափակ ուղղություններ են ընդգրկված փաստահավաք խմբի գործառույթներում․ ինչո՞ւ օրինակ Քովիդ-19-ը, որը մեր հազարավոր հայրենակիցների մահվան պատճառ է դարձել, և կան հանրային դժգոհություններ, այս հարցն ընդգրկված չէ՝ պատճառահետևանքային վերլուծության տեսակետից»։

«Հայաստանում ինչքան քննիչ կա, զբաղվում է Քովիդ-19-ով, որ մի մարմին էլ քիչ զբաղվի դրանով, աշխարհը փուլ չի գա․․․ Եկեք այլ երգեր փնտրենք և ամեն անգամ փաստահավաք կամ քննիչ հանձնաժողովների վերաբերյալ քննարկումների ժամանակ այդ ամեն ինչը չհիշենք»,- արձագանքել է Թորոսյանը։