«Գերմանիայի հետախուզության նախկին ղեկավարը լրտեսել է Ադրբեջանի օգտին». #DerSpiegel

Գերմանիայի Դաշնային հետախուզական ծառայության (BND) նախկին ղեկավար Աուգուստ Հաննինգը, որը ձերբակալվել է լրտեսության մեջ կասկածվելու հիմքով, գաղտնի փաստաթղթեր է օգտագործել Ադրբեջանի հետախուզական ծառայության համար զեկույց պատրաստելու համար։ Այս մասին հայտնում է Der Spiegel-ը՝ հղում կատարելով հետաքննության նյութերին։

Պարբերականը նշել է, որ Ավգուստ Հաննինգն անհրաժեշտ տեղեկությունները ստացել է BND-ում մնացած տեղեկատուի միջոցով։ Քննությունը դեռևս չի պարզել՝ արդյոք Ադրբեջանի հետախուզության ներկայացուցիչը ստացել է իր համար պատրաստված փաստաթղթերը։

Ավելի ուշ Ադրբեջանի ԶԼՄ-ների և հեռարձակման հարցերով խորհուրդը հերքել է Ավգուստ Հաննինգի գործի հետ երկրի առնչությունը։

Նշենք, որ Ավգուստ Հաննինգը և նրա ենթադրյալ հանցակիցը ձերբակալվել են նախօրեին։ Առաջինին մեղադրանք է առաջադրվել պետական դավաճանության և լրտեսության, իսկ երկրորդին՝ պետական դավաճանության փորձին օժանդակելու և լրտեսության մեջ։